បរទេស៖ លោក Jurgen Klopp អ្នកចាត់ការទូទៅរបស់ក្រុម Liverpool បានបញ្ជាក់ថា លោកនៅតែមានថាមពលយ៉ាងពេញលេញ ដើម្បីផ្លាស់ប្តូររដូវកាលរបស់ក្រុមម្ចាស់ជើងឯកអង់គ្លេសមួយនេះ ក្រោយពីការរងបរាជ័យ៣លើកជាប់ៗគ្នា បានបញ្ចប់ឱកាសជាក់លាក់របស់ក្រុមហង្សក្រហមក្នុងការការពារពាន Premier League របស់ពួកគេ។
ក្រុមរបស់លោក Klopp នឹងបង្វែរការចាប់អារម្មណ៍របស់ខ្លួន ទៅកាន់ក្របខ័ណ្ឌ Champions League វិញនៅរាត្រីនេះ នៅពេលដែលពួកគេធ្វើដំណើរទៅជួបក្រុម RB Leipzig ក្នុងការប្រកួតជើងទី១នៃវគ្គ១៦ក្រុមចុងក្រោយ។ ការលើកឡើងរបស់ក្រុមអ្នកលេងបណ្តាញសង្គម ក្រោយពីការរងបរាជ័យក្នុងលទ្ធផល ៣-១ ក្រោមស្នាដៃក្រុម Leicester ថា លោក Klopp អាចនឹងចាកចេញពីតំណែរបស់ខ្លួន ត្រូវបានច្រានចោលដោយគ្រូបង្វឹកសញ្ជាតិអាល្លឺម៉ង់រូបនេះ ដែលបានរគុណដល់អ្នកគាំទ្រចំពោះការលើកបដារដែលសរសេរថា «YNWA (You’ll Never Walk Alone) Jurgen» នៅខាងក្រៅកីឡដ្ឋាន Anfield របស់ក្លិបកាលពីថ្ងៃអាទិត្យ។ នៅក្នុងសន្និសីទសារព័ត៌មាននៅមុនពេលប្រកួត កាលពីថ្ងៃចន្ទ លោក Klopp បានឲ្យដឹងថា៖ «ខ្ញុំប្រហែលជាមិនស្ថិតក្នុងសភាពបែបនេះឡើយ ពុកមាត់របស់ខ្ញុំប្រែពណ៌ទៅជាប្រផេះ ប៉ុន្តែ ខ្ញុំមានពោរពេញដោយថាមពល។
ស្ថានភាពនេះ គឺជាការប្រជែងមួយ ពោលគឺជាការប្រជែងដ៏គួរឲ្យចាប់អារម្មណ៍មួយ»។ លោកបានបន្ថែមទៀតថា៖ «យើងនឹងដោះស្រាយបញ្ហានេះ។ យើងនឹងដោះស្រាយដោយការលេងកីឡាបាល់ទាត់ តាមរយៈការសាមគ្គីគ្នាបន្ថែមទៀត តាមរយៈការរៀនបន្ថែមជាងអ្វីដែលយើងអាចរៀនក្នុងរដូវកាលនីមួយៗ ដែលយើងបានលេងពីមុន»៕
ប្រភពព័ត៌មាន៖ Channel News Asia