បរទេស៖ លោក Mauricio Pochettino គ្រូបង្វឹករបស់ក្លិប Paris Saint-Germain បានបញ្ជាក់កាលពីថ្ងៃចន្ទថា ក្រុមរបស់លោកនៅតែ «មានអារម្មណ៍រំភើប» សម្រាប់ការធ្វើដំណើរទៅប្រកួតក្របខ័ណ្ឌ Champions League វគ្គ១៦ក្រុមចុងក្រោយ ជើងទី១ នៅលើទឹកដីក្រុម Barcelona នៅរាត្រីនេះ បើទោះបីអវត្តមានតារាឆ្នើម Neymar ក៏ដោយ។
កីឡាករមានតម្លៃខ្លួនខ្ពស់ជាងគេបំផុតក្នុងពិភពលោករូបនេះ រួមជាមួយនឹងខ្សែប្រយុទ្ធ Angel Di Maria នឹងត្រូវអវត្តមានសម្រាប់ការធ្វើដំណើរទៅកាន់កីឡដ្ឋាន Camp Nou ដោយសារតែបញ្ហារបួស។ លោក Pochettino ដែលបានចូលកាន់តំណែងជំនួសលោក Thomas Tuchel កាលពីខែមករានោះ បានថ្លែងនៅក្នុងសន្និទីសារព័ត៌មានកាលពីល្ងាចថ្ងៃចន្ទថា៖ «អ្នកអាចមើលឃើញពីភាពរំភើបនៅក្នុងក្លិបនេះ។ សម្រាប់ PSG គោលដៅដ៏ជាក់លាក់របស់យើងគឺការឈ្នះពាន Champions League ហើយយើងយល់ច្បាស់ពីការទទួលខុសត្រូវ»។ លោកបានប្រាប់បន្តថា៖ «ពិតណាស់ ការអវត្តមានតារាឆ្នើមដូចជា Neymar និង Di María ពិតជាសំខាន់ណាស់ ប៉ុន្តែ យើងមានក្រុមកីឡាករមួយដែលស្រេកឃ្លានក្នុងការលេងការប្រកួតនេះ ហើយខ្ញុំប្រាកដចិត្តថា នរណាក៏ដោយដែលលេងនៅថ្ងៃស្អែកនេះ នឹងព្យាយាមបំពេញតួនាទីរបស់ខ្លួន»។
ខ្សែបម្រើ Marco Verratti របស់ក្លិប PSG ក៏ស្ថិតក្នុងភាពមិនច្បាស់ផងដែរ ក្រោយពីអវត្តមានក្នុងពេលពួកគេបានយកឈ្នះលើក្រុម Nice កាលពីចុងសប្តហ៍មុន ដោយសារតែបញ្ហាចង្កេះ។ លោក Pochettino បានបន្ថែមថា៖ «យើងធ្វើដំណើរមួយជំហានម្តងៗ ហើយយើងនឹងវិភាគទៅលើ Marco ក្នុងពេលហ្វឹកហាត់នៅថ្ងៃនេះ»៕
ប្រភពព័ត៌មាន៖ Channel News Asia
