បរទេស៖ ខ្សែបម្រើ Jordan Henderson ប្រធានក្រុមនៃក្រុម Liverpool បានបញ្ជាក់ថា «ការងារទើបតែបានបញ្ចប់ពាក់កណ្តាលនៅឡើយទេ» ក្រោយពីការដណ្តើមបានជ័យជម្នះ ២-០ របស់ក្រុមហង្សក្រហម លើក្រុម RB Leipzig កាលពីថ្ងៃអង្គារ បានជួយឲ្យពួកគេបោះជំហានទៅមុខដ៏រឹងមាំមួយ ក្នុងក្របខ័ណ្ឌ Champions League វគ្គ១៦ក្រុមចុងក្រោយ។
គ្រាប់បាល់ស៊ុតបញ្ចូលទីពីសំណាក់ខ្សែប្រយុទ្ធ Mohamed Salah និង Sadio Mane នៅក្នុងចន្លោះពេលត្រឹមតែ២នាទី នៅដើមតង់ទី២ បានបំពេញជ័យជម្នះសម្រាប់ក្រុម Liverpool នាការប្រកួតជើងទី១ ក្នុងទីក្រុង Budapest។ Henderson បានប្រាប់បណ្តាញសារព័ត៌មាន BT Sport ថា៖ «សរុបមក នេះគឺជាការបង្ហាញពីទម្រង់លេងដ៏គួរឲ្យរីករាយមួយ ជាការឈ្នះដ៏កក់ក្តៅ ប៉ុន្តែ នេះគ្រាន់តែការបញ្ចប់ការងារពាក់កណ្តាលប៉ុណ្ណោះ។ យើងត្រូវតែរក្សាការធ្វើដំណើរទៅមុខ និងរក្សាការប្រយុទ្ធជានិច្ច។ យើងបានជួបស្ថានភាពលំបាកៗជាច្រន ក្នុងរដូវកាលនេះ»។ ខ្សែបម្រើរូបនេះបានបន្ថែមទៀតថា៖ «នៅរាត្រីនេះ គឺជាការបោះជំហានទៅមុខដ៏ល្អមួយ ក្នុងទិសដៅដ៏ត្រឹមត្រូវ ប៉ុន្តែ យើងត្រូវតែបន្តជាមួយនឹងភាពខ្លាំងនេះ ហើយប្រសិនបើយើងធ្វើបាន យើងនឹងទទួលបានលទ្ធផលល្អជានិច្ច»។
Liverpool បានស្តារមុខមាត់វិញ ពីការរងបរាជ័យជាប់ៗគ្នាក្នុងក្របខ័ណ្ឌ Premier League ដែលបានធ្វើឲ្យពួកគេដេញតាមពីក្រោយក្រុម Manchester City ដល់ទៅ១៣ពិន្ទុ៕
ប្រភពព័ត៌មាន៖ Channel News Asia
