បរទេស៖ ខ្សែប្រយុទ្ធ Cristiano Ronaldo នឹងទៅកាន់ប្រទេសកំណើតរបស់គេ ព័រទុយហ្គាល់ ជាលើកទី១ ក្នុងនាមជាកីឡាកររបស់ Juventus នៅពេលដែលក្រុមរបស់គេធ្វើដំណើរទៅជួបក្រុម Porto នៅរាត្រីនេះ ស្របពេលដែលក្រុមយក្សអ៊ីតាលីមួយនេះ នឹងព្យាយាមរក្សាកម្រិតលេងឲ្យស្មើនឹងក្រុមខ្លាំងៗបំផុតនៅអឺរ៉ុប ក្នុងក្របខ័ណ្ឌ Champions League។
នៅលើទីលានប្រកួត ក្រុម Juventus នៅតែកំពុងតែស្វែងភាពខ្លាំងរបស់ខ្លួន ក្រោមការដឹកនាំរបស់លោកគ្រូបង្វឹកជើងថ្មី Andrea Pirlo ប៉ុន្តែ ពួកគេស្រេកឃ្លានជ័យជម្នះក្នុងក្របខ័ណ្ឌអឺរ៉ុប ជាងពានណាៗទាំងអស់ ក្រោយពីបានរងបរាជ័យក្នុងក្របខ័ណ្ឌ Champions League វគ្គផ្តាច់ព្រ័ត្រចំនួន៥លើក បើគិតចាប់តាំងពីបានឈ្នះពានជាលើកចុងក្រោយ ក្នុងឆ្នាំ១៩៩៦។ ស្របពេលជាមួយគ្នានេះ នៅលើក្រៅទីលានប្រកួតវិញ លោក Andrea Agnelli ដែលជាប្រធានក្លិប គឺជាបុគ្គលម្នាក់ក្នុងចំណោមបុគ្គលសំខាន់ៗដែលជួយជ្រោមជ្រែងគម្រោងក្នុងការកែទម្រង់យុទ្ធនាការកម្រិតកំពូលរបស់អឺរ៉ុបមួយនេះ។ ជាមួយគ្នានេះ ក្រុមសេះបង្កង់ Juventus នឹងត្រូវតែដោះស្រាយក្នុងតំបន់ការពាររបស់ខ្លួន ពេលពួកគេធ្វើដំណើរទៅជួបក្រុម Porto ក្នុងក្របខ័ណ្ឌ Champions League វគ្គ១៦ក្រុមចុងក្រោយ ជើងទី១។
លោក Pirlo គ្រូបង្វឹក Juventus បាននិយាយក្នុងសន្និសីទសារព័ត៌មានកាលពីថ្ងៃអង្គារថា ខ្សែការពារ Leonardo Bonucci និងខ្សែបម្រើអាហ្សង់ទីន Paolo Dybala នឹងត្រូវអវត្តមាន ប៉ុន្តែ ខ្សែបម្រើវេលស៍ Aaron Ramsey នឹងវិលទៅកាន់ក្រុមនេះវិញ៕
ប្រភពព័ត៌មាន៖ Channel News Asia
