បរទេស៖ លោក Mauricio Pochettino បានបង្ហើបប្រាប់ឱ្យដឹងថាកូនក្រុម Kylian Mbappe បានព្យាករណ៍ថាក្នុងនាមជាភ្ញៀវ PSG នឹងយកឈ្នះម្ចាស់ផ្ទះ Barcelona នៅឯកីឡាដ្ឋាន Camp Nou។
ទីបំផុត ការទស្សន៍ទាយរបស់កីឡាករវ័យ២១ឆ្នាំរូបនេះបានក្លាយជាការពិតខណៈខ្សែប្រយុទ្ធអន្តរជាតិបារាំង រកបានដល់ទៅ ៣គ្រាប់ ជួយអោយ PSG ផ្តួល Barcelona ៤-១ក្នុងជំនួបពានរង្វាន់ទ្វីបអឺរ៉ុប (Champions League) វគ្គ១៦ក្រុមចុងក្រោយជើងទី១យប់ថ្ងៃអង្គារនេះ។
ជាអតីតគ្រូបង្វឹក Espanyol បច្ចុប្បន្នក្នុងនាមអ្នកចាត់ការទូទៅក្រុម PSG ធ្លាប់មានប្រវត្តិផ្តួល Barcelona ម្តងគត់ពេលប្រកបអាជីពនៅអេស្បាញ។ ដូច្នេះមុនជំនួបយប់មិញរូបលោកបានសាកសួរ Mbappe នៅក្នុងសន្និសិទមុនការប្រកួតស្តីពីលទ្ធភាពផ្តួល Barcelona ដែលធ្លាប់ជាគូប្រជែងដ៏យូរកន្លងមកតើអាចទៅរួចទេ។ សមាជិកជ័យលាភី World Cup ២០១៨រូបនេះបានឆ្លើយតបទៅគ្រូបង្វឹកប្រកបដោយស្នាមញញឺមយ៉ាងខ្លីថាៈថ្ងៃស្អែកយើងនិងឈ្នះជាលើកទី២ជាមួយគ្នា៕
ប្រភពព័ត៍មាន៖ Goal
