បរទេស៖ ការប្រកួតជាលើកដំបូងរបស់ Cristiano Ronaldo សម្រាប់ក្រុម Juventus ក្នុងប្រទេសកំណើតរបស់គេ ព័រទុយហ្គាល់ បានបញ្ចប់ដោយការរងបរាជ័យក្នុងលទ្ធផល ២-១ ខណៈដែលក្រុម FC Porto បានលេងបានល្អប្រសើរជាងក្រុមមកអ៊ីតាលីមួយនេះ ក្នុងការប្រកួតក្របខ័ណ្ឌ Champions League វគ្គ១៦ក្រុមចុងក្រោយ ជើងទី១ កាលពីថ្ងៃពុធ។
ការបង្ហាញពីទម្រង់លេងដ៏ទន់ជ្រាយរបស់ក្រុម Juventus នាំឲ្យលោកគ្រូបង្វឹក Andrea Pirlo លើកឡើងថា ក្រុមរបស់លោកបានផ្តល់ជ័យជម្នះឲ្យក្រុមម្ចាស់ផ្ទះ «ដោយងាយស្រួល»។ ខ្សែប្រយុទ្ធអន្តរជាតិអ៊ីរ៉ង់ Mehdi Taremi បានជួយឲ្យក្រុម Porto រកបានគ្រាប់បាល់នាំមុខមុន ក្រោយពីលេងបានត្រឹមតែ១នាទីនៅកីឡដ្ឋាន Estadio do Dragao ក្រោយពីការប្រព្រឹត្តកំហុសរបស់កីឡាករ Rodrigo Bentancur។ បន្ទាប់មក ខ្សែប្រយុទ្ធអន្តរជាតិម៉ាលី Moussa Marega បានបន្ថែមគ្រាប់បាល់ទី២ បន្ទាប់ពីសម្រាកតង់ទី១។ ប៉ុន្តែ កីឡាករ Federico Chiesa បានវាយបក១គ្រាប់វិញ នៅរយៈពេល៨នាទីចុងក្រោយ ដើម្បីជួយរក្សាក្តីសង្ឃឹមរបស់ក្រុម Juventus មុននឹងឈានទៅកាន់ការប្រកួតជើងទី២ នៅក្នុងទីក្រុង Turin នាថ្ងៃទី៩ ខែមីនា។
លោក Pirlo បានឲ្យថា៖ «ការចាប់ផ្តើមប្រកួតមានកំហុសតាំងពីនាទីដំបូង។ នៅពេលដែលអ្នករបូតគ្រាប់បាល់១គ្រាប់បែបនេះ ជាធម្មតា ការបារម្ភនឹងកើតឡើង ហើយអ្នកខ្វះនូវភាពជាក់លាក់របស់ខ្លួន»៕
ប្រភពព័ត៌មាន៖ Channel News Asia