បរទេស៖ ខ្សែប្រយុទ្ធ Erling Braut Haaland បានបង្ហាញពីទម្រង់លេងដ៏មុតស្រួចមួយផ្សេងទៀត តាមរយៈការស៊ុតបាល់បញ្ចូលទី២គ្រាប់នៅតង់ទី២ ខណៈដែលក្រុម Borussia Dortmund បានវាយបកដេញតាមពីក្រោយដើម្បីផ្តួលក្រុម Sevilla ក្នុងលទ្ធផល ៣-២ ក្នុងប្រទេសអេស្ប៉ាញ នាការប្រកួតជើទី១នៃក្របខ័ណ្ឌ Champions League វគ្គ១៦ក្រុមចុងក្រោយ កាលពីថ្ងៃអង្គារ។
ការស៊ុតបាល់ផ្លាតចូលទីរបស់ Suso បានជួយឲ្យក្រុមម្ចាស់ជើងក្របខ័ណ្ឌ Europa League កាលពីរដូវកាលមុន Sevilla មានគ្រាប់បាល់នាំមុខមុន នៅកីឡដ្ឋានដែលគ្មានអ្នកទស្សនា Ramon Sanchez Pizjuan ប៉ុន្តែ Mahmoud Dahoud បានរកគ្រាប់បាល់តាមស្មើវិញភ្លាមៗ នៅមុនពេល Haaland បានរកគ្រាប់បាល់កាត់សេចក្តី។ តារាឆ្នើមទើបតែរះរបស់ន័រវែសមួយនេះ បានជួយឲ្យក្រុម Dortmund រកបានគ្រាប់បាល់នាំមុខវិញនៅនាទី ទី២៧ ហើយបន្ទាប់មក ស៊ុតបាល់បញ្ចូលទីម្តងទៀត នៅរយៈពេល២នាទីចុក្រោយនៃតង់ទី១ ខណៈដែលគ្រាប់បាល់នេះធ្វើឲ្យគ្រាប់បាល់សរុបរបស់គេកើនដល់២៥គ្រាប់ ក្នុងការបង្ហាញខ្លួន២៥លើកនៅរដូវកាលនេះ ក្នុងរាល់យុទ្ធនាការទាំងអស់។ ស្របពេលដែលនៅតែស្ថិតក្នុងវ័យ២០ឆ្នាំ រូបគេបានស៊ុតបាល់បញ្ចូលទី១៨គ្រាប់ ក្នុងការប្រកួតក្របខ័ណ្ឌ Champions League ១៣លើក បើគិតចាប់តាំងពីដើមរដូវកាលមុន។
លោក Julen Lopetegui គ្រូបង្វឹករបស់ Sevilla បាននិយាយថា៖ «យើងមិនសមចាញ់ឡើយ ប៉ុន្តែ ទីបំផុត ពួកគេមានកីឡាករដ៏ឆ្នើមម្នាក់ក្នុងពិភពលោក នៅតំបន់ប្រយុទ្ធ ហើយរូបគេបានបង្កើតឲ្យមាការប្រែប្រួល នៅក្នុងស្ថានភាព៣ ដែលគួរតែអាចជៀសផុតបាន»៕
ប្រភពព័ត៌មាន៖ Channel News Asia