បរទេស៖ ក្រុមបិសាចក្រហម Manchester United និងមាន់ខ្នាយដែក Tottenham Hotspur បានបង្កើតការនាំមុខយ៉ាងកក់ក្តៅ តាមរយៈការដណ្តើមបានជ័យជម្នះនៅក្រៅដីរៀងៗខ្លួន ក្នុងការប្រកួតក្របខ័ណ្ឌ Europa League វគ្គ៣២ក្រុមចុងក្រោយ ជើងទី១របស់ពួកគេ ប៉ុន្តែ ក្រុម AC Milan បានបញ្ចប់ក្នុងលទ្ធផលស្មើ ២-២ នៅលើទឹកដីក្រុម Red Star Belgrade ស្របពេលដែលយុទ្ធនាការនេះបានចាប់ផ្តើមប្រកួតឡើងវិញកាលពីថ្ងៃព្រហស្បតិ៍។
Man United បានលត់ក្រុម Real Sociedad យ៉ាងចាស់ដៃក្នុងលទ្ធផល ៤-០ ក្នុងការប្រកួតមួយដែលត្រូវបានរៀបចំឡើងនៅទីក្រុង Turin ដោយសារតែការរិតត្បិតជុំវិញវីរុសកូវីដ ១៩ រវាងចក្រភពអង់គ្លេស និងអេស្ប៉ាញ ខណៈដែល Bruno Fernandes បានក្លាយជាវីរសបុរសម្តងទៀតសម្រាប់ក្រុមរបស់គេ តាមរយៈការស៊ុតបាល់បញ្ចូលទី២គ្រាប់។ ខ្សែបម្រើអន្តរជាតិព័រទុយហ្គាល់រូបនេះ បានរកគ្រាប់បាល់បើកឆាកនៅនាទី ទី២៧ ជាមួយនឹងគ្រាប់បាល់ទី២០របស់គេ នៅរដូវកាលនេះ និងបានស៊ុតបាល់កោងចូលទីយ៉ាងល្អមួយគ្រាប់ទៀត នៅនាទី ទី៥៧ នៅមុនពេល Marcus Rashford និង Daniel James បានបំពេញជ័យជម្នះសម្រាប់ក្រុមខ្លួន។
លោក Ole Gunnar Solskjaer អ្នកចាត់ការទូទៅរបស់ក្រុម Man United បានឲ្យដឹងថា៖ «យើងសមនឹងទទួលជ័យជម្នះ ប៉ុន្តែ ប្រហែលជាមិនមែនការស៊ុតបាល់បញ្ចូលទី៤គ្រាប់ឡើយ។ ក្នុងការប្រកួតបែបនេះ នៅពេលដែលយើងរកឃើញភាពស៊ីសង្វាក់គ្នា យើងអាចក្លាយជាក្រុមដ៏ខ្លាំងមួយ»។ ជាមួយគ្នានេះ ការប្រកួតក្រៅដីរបស់ក្រុម Tottenham ជាមួយនឹងក្រុមអូទ្រីស Wolfsberg ក៏ត្រូវបានប្តូរទៅកាន់ប្រទេសផ្សេងផងដែរ ខណៈដែលក្រុមរបស់អង់គ្លេស បានយកឈ្នះ ៤-១ នៅកីឡដ្ឋាន Puskas Arena ក្នុងទីក្រុង Budapest៕
ប្រភពព័ត៌មាន៖ Channel News Asia
