បរទេស៖ Paris Saint-Germain បានរងឥទ្ធិពលពីការប្រកួតក្របខ័ណ្ឌ Champions League ខណៈដែលការរងបរាជ័យក្នុងលទ្ធផល ២-០ ពេលប្រកួតជាមួយនឹង Monaco អតីតក្រុមរបស់ខ្សែប្រយុទ្ធ Kylian Mbappe កាលពីថ្ងៃអាទិត្យ បានប៉ះពាល់ដល់ក្តីសង្ឃឹមនៃការប្រជែងពាន Ligue 1 ក្រោយពី Lille បានដណ្តើមយកលេខ១លើតារាងវិញ។
គ្រាប់បាល់ស៊ុតបញ្ចូលទីនៅតង់នីមួយៗ ពីកីឡាករ Sofiane Diop និង Guillermo Maripan បានជួយឲ្យក្រុម Monaco ដណ្តើមបានពិន្ទុនៅលើទឹកដីក្រុម PSG ដើម្បីបន្តកំណត់នៃការមិនស្គាល់ចាញ់រហូតដល់ទៅ១១ប្រកួត និងជួយឲ្យពួកគេដេញតាមពីក្រោយក្រុមឈរលេខ៣ត្រឹមតែ២ពិន្ទុប៉ុណ្ណោះ។ ស្របពេលដែលក្រុម Monaco នៅតែស្ថិតក្នុងការប្រជែងដណ្តើមយកកៅអីក្នុងក្របខ័ណ្ឌ Champions League ក្រុម PSG កំពុងតែដេញតាមពីក្រោយក្រុម Lyon ១ពិន្ទុ ហើយ៤ពិន្ទុតាមពីក្រោយ Lille ដែលបានដណ្តើមចំណាត់ថ្នាក់លេខ១ត្រលប់មកវិញ កាលពីថ្ងៃអាទិត្យ ក្រោយពីបានផ្តួលក្រុម Lorient ៤-១។
នេះគឺជារាត្រីដ៏ខកចិត្តសម្រាប់ PSG ខណៈដែលពួកគេមិនអាចរក្សាភាពខ្លាំងរបស់ខ្លួនពីការប្រកួតកាលពីពាក់កណ្តាលសប្តាហ៍មុន ដែលនៅពេលនោះពួកគេបានផ្តួលក្រុម Barcelona យ៉ាងចាស់ដៃក្នុងការប្រកួតក្របខ័ណ្ឌ Champions League វគ្គ១៦ក្រុមចុងក្រោយ ជើងទី១ ដោយ Mbappe ស៊ុតបាល់បញ្ចូលទី៣គ្រាប់ ក្នុងពេលពួកគេបានយកឈ្នះលើ ៤-១៕
ប្រភពព័ត៌មាន៖ Channel news Asia