បរទេស៖ លោក Thomas Tuchel គ្រូបង្វឹករបស់ Chelsea បានបញ្ជាក់ថា លោកគឺជាអ្នកគាំទ្រម្នាក់របស់តារាឆ្នើម Luis Suarez ដោយលោកបានព្យាយាមទិញយកខ្សែប្រយុទ្ធអន្តរជាតិអ៊ុយរូហ្គាយរូបនេះ ឲ្យក្លិប Paris Saint-Germain នៅមុនពេលរូបគេបានផ្ទេរពីក្លិប Barcelona ទៅកាន់ក្លិប Atletico Madrid កាលពីខែកញ្ញា។
ជាមួយគ្នានេះ លោក Diego Simeone គ្រូបង្វឹករបស់ក្រុម Atletico បានទទួលស្គាល់កាលពីថ្ងៃចន្ទថា Suarez គឺជាកូនសោក្នុងក្រុមរបស់លោកដើម្បីផ្តួលក្រុម Chelsea ក្នុងការប្រកួតក្របខ័ណ្ឌ Champions League វគ្គ១៦ក្រុមចុងក្រោយ។ ក្នុងការប្រកួតចំនួន៧លើកក្នុងនាមជាអ្នកចាត់ការទូទៅរបស់ក្រុម Chelsea លោក Tuchel នៅតែមិនទាន់ស្គាល់ចាញ់នៅឡើយទេ ខណៈដែលក្រុមមានមូលដ្ឋាននៅទីក្រុងឡុងដ៍មួយនេះ កំពុងតែស្ថិតក្នុងចំណាត់ថ្នាក់លេខ៥ នៅលើតារាងក្របខ័ណ្ឌ Premier League និងឈានទៅប្រកួតពាន FA Cup វគ្គ៨ក្រុមចុងក្រោយ។ ប៉ុន្តែ ទោះបីជាយ៉ាងណា គ្រូបង្វឹកសញ្ជាតិអាល្លឺម៉ង់រូបនេះ ប្រឈមមុខនឹងការប្រជែងដ៏ធំបំផុត នៅពេលប្រកួតជាមួយនឹងក្រុម Atletico ដែលពោរពេញដោយបទពិសោធក្នុងវគ្គចាញ់ធ្លាក់នៃក្របខ័ណ្ឌ Champions League ក្រោមការដឹកនាំរបស់លោក Simeone។
លោក Tuchel បានឲ្យដឹងកាលពីថ្ងៃចន្ទថា៖ «នេះគឺជាការប្រកួតដ៏ធំមួយសម្រាប់យើង ពោលគឺទាំងកីឡាករ ស្មារតី និងភាពរឹងមាំ។ នេះគឺជាក្រុមពោរពេញដោយបទពិសោធក្នុងកម្រិតនេះ រួមជាមួយនឹងគ្រូបង្វឹកដ៏ឆ្នើមដែលយើងនឹងត្រូវប្រកួតជាមួយ»៕
ប្រភពព័ត៌មាន៖ Channel News Asia
