បរទេស៖ លោក Hansi Flick គ្រូបង្វឹកនៃក្រុម Bayern Munich បានបញ្ជាក់ថា ក្រុមរបស់លោកមិនត្រូវរកលែសឡើយ នៅពេលដែលក្រុមម្ចាស់ការពារជើងឯកមួយនេះ ធ្វើដំណើរទៅជួបក្រុម Lazio ក្នុងការប្រកួតវគ្គ១៦ក្រុមចុងក្រោយ ជើងទី១ នៅរាត្រីនេះ ក្រោយពីការធ្លាក់ចុះទម្រង់លេងនាពេលថ្មីៗ។
លោក Flick បានប្រាប់សន្និសីទសារព័ត៌មានកាលពីថ្ងៃចន្ទថា៖ «ខ្ញុំចង់ឲ្យក្រុមរបស់ខ្ញុំបង្កើតឲ្យមានការប្រែប្រួលតាំងពីចាប់តាំងផ្តើមប្រកួត ហើយខ្ញុំមានការជឿជាក់ទាំងស្រុងថា ពួកគេនឹងធ្វើបាននៅលើទឹកដីក្រុម Lazio»។ ក្រុម Bayern បានរងបរាជ័យក្នុងលទ្ធផល ២-១ នៅលើទឹកដីក្រុម Eintracht Frankfurt កាលពីថ្ងៃសៅរ៍ ក្រោយពីបានបញ្ចប់ក្នុងលទ្ធផលស្មើ ៣-៣ ជាមួយនឹងក្រុម Arminia Bielefeld បន្ទាប់ពីឈ្នះពាន Club World Cup ក្នុងប្រទេស កាតា កាលពី១១ថ្ងៃមុន។ ភាពខ្លាំងនៅក្នុងក្រុម Bayern ត្រូវបានគេអង្កេតមើល ចាប់តាំងពីកីឡាករ Benjamin Pavard និង Thomas Mueller សុទ្ធសឹងតេស្តឃើញលទ្ធផលវិជ្ជមានលើវីរុសកូវីដ ១៩។ ខ្សែបម្រើ Corentin Tolisso នឹងត្រូវអវត្តមានរយៈពេលវែង ដោយសារតែរបួសភ្លៅ។
ប៉ុន្តែ ទោះបីជាយ៉ាងណា លោក Flick កំពុងតែទាមទារឲ្យក្រុមឈរលេខ១លើតារាងក្របខ័ណ្ឌ Bundesliga ស្តារមុខមាត់វិញ នៅកីឡដ្ឋាន Olympic ក្នុទីក្រុងរ៉ូម។ លោក Flick បានបន្ថែមថា៖ «យើងទាំងអស់គ្នាដឹងពីអ្វីដែលបានកើតឡើងកាលពីប៉ុន្មានថ្ងៃមុន។ ខ្ញុំនឹងមិនប្រើលែសនានាឡើយ»៕
ប្រភពព័ត៌មាន៖ Channel News Asia