បរទេស៖ លោក Zinedine Zidane បានបញ្ជាក់កាលពីថ្ងៃអង្គារថា ក្រុម Real Madrid កំពុងតែត្រៀមខ្លួនសម្រាប់ការប្រកួតផ្សេងគ្នាមួយ ជាមួយឹនងក្រុមខ្លាំងលាក់មុខ Atalanta ដែលក្រុមយក្សអេស្ប៉ាញមួយនេះ នឹងត្រូវជួបជាលើកដំបូងក្នុងក្របខ័ណ្ឌ Champions League ក្នុងប្រទេសអ៊ីតាលី។
នៅមុនពេលការប្រកួតវគ្គ១៦ក្រុមចុងក្រោយ ជើងទី១នៅរាត្រីនេះ លោក Zidane សញ្ជាតិបារាំង បានឲ្យដឹងថា៖ «សម្រាប់យើង នេះគឺជាការប្រកួតផ្សេងគ្នាមួយ។ យើងមិនស្គាល់គូប្រកួតរបស់យើងឡើយ។ យើងត្រូវតែសម្របខ្លួនទៅនឹងប្រភេទនៃការប្រកួតនេះ ដែលមានក្រុម Atalanta»។ លោកបានប្រាប់បន្តថា៖ «ក្រុម Atalanta បានបង្ហាញពីភាពខ្លាំងរបស់ខ្លួនកាលពីឆ្នាំមុន។ ពួកគេគឺជាក្រុមដែលមានភាពមុតស្រួចក្នុងតំបន់ប្រយុទ្ធ ប្រជុំដោយកីឡាករឆ្នើមៗជាច្រើន។ ពួកគេមានសាមគ្គីភាព និងលេងស៊ីសង្វាក់គ្នា»។ លោក Zidane បានដឹកនាំឲ្យក្រុម Real ឈ្នះពាន៣លើកក្នុងចំណោមពានទ្វីបអឺរ៉ុបទាំង១៣លើករបស់ពួកគេ ពោលគឺនៅចន្លោះឆ្នាំ២០១៦ និង២០១៨។
ប៉ុន្តែ Real ធ្វើដំណើរទៅកាន់ភាគខាងជើងនៃប្រទេសអ៊ីតាលី រួមជាមួយនឹងបញ្ជីឈ្មោះកីឡាកររបួសជាច្រើន រួមទាំង Karim Benzema, Sergio Ramos និងDani Carvajal ផងដែរ។ លោក Zidane បានបន្ថែមថា៖ «ពិតណាស់មានកីឡាករជាច្រើនដែលមិនអាចចូលលេងបាន ប៉ុន្តែ យើងនឹងប្រកួតជាមួយនឹងកីឡាករដែលយើងមាន។ យើងបានត្រៀមខ្លួនយ៉ាងល្អសម្រាប់ការប្រកួតនេះ»៕
ប្រភពព័ត៌មាន៖ Channel News Asia
