បរទេស៖ លោក Marco Rose គ្រូបង្វឹករបស់ក្រុម Borussia Moenchengladbach បានបញ្ជាក់ថា ក្រុមរបស់លោកមិនមានហេតុផលអ្វីត្រូវចាញ់ពេលប្រកួតជាមួយនឹងក្រុមកំពុងឡើងទម្រង់លេង Manchester City ដែលបានឈ្នះ១៨លើកជាប់ៗគ្នា ក្នុងការប្រកួតក្របខ័ណ្ឌ Champions League វគ្គ១៦ក្រុមចុងក្រោយ ជើងទី១ នៅរាត្រីនេះឡើយ។
ការដណ្តើមបានជ័យជម្នះ ១-០ របស់ក្រុម Man City លើក្រុម Arsenal កាលពីថ្ងៃអាទិត្យ បានបន្តកំណត់ត្រាឈ្នះជាប់ៗគ្នារបស់ពួកគេ ក្នុងរាល់យុទ្ធនាការទាំងអស់ ស្របពេលដែល Gladbach កំពុងតែធ្លាក់ចុះទម្រង់លេងក្នុងក្របខ័ណ្ឌ Bundesliga ក្រោយពីដណ្តើមបាន១ពិន្ទុគត់ពីការប្រកួត៣លើកចុងក្រោយរបស់ពួកគេ។ ជាមួយគ្នានេះ ការគោរពវិន័យក៏ធ្លាក់ចុះផងដែរក្នុងក្រុម Gladbach ក្រោយពីការចេញសេចក្តីប្រកាសដ៏គួរឲ្យភ្ញាក់ផ្អើលកាលពីសប្តាហ៍មុនថា លោក Rose នឹងការចាកចេញ នៅចុងរដូវកាលនេះ ដើម្បីទៅដឹកនាំក្លិប Dortmund។ ប៉ុន្តែ ទោះបីជាយ៉ាងណា ការផ្តោតអារម្មណ៍នឹងធ្លាក់ទៅលើការខិតខំព្យាយាមដើម្បីផ្តួលក្រុមប្រជុំដោយតារាឆ្នើមៗរបស់លោក Pep Guardiola។
ស្របពេលដែលការប្រកួតក្នុងដីនឹងត្រូវធ្វើឡើងនៅទីក្រុង Budapest ដោយសារតែការរិតត្បិតលើការធ្វើដំណើរជុំវិញករណីកូវីដ ១៩ របស់អាល្លឺម៉ង់ លោក Rose បាននិយាយកាលពីថ្ងៃអង្គារថា៖ «កីឡាករទទួលបានរាត្រីដ៏ពិសេសនេះ។ អ្នកត្រឹមតែអាចឈ្នះមុនប៉ុណ្ណោះក្នុងការប្រកួតមួយបែបនេះ។ នេះគឺជាគោលដៅដ៏ធំមួយសម្រាប់ក្លិបនេះ ក្នុងពេលដែលយើងកំពុងស្ថិតក្នុងវគ្គ១៦ក្រុមចុងក្រោយ។ កីឡាករគួរតែរីករាយនឹងឱកាសនេះ»៕
ប្រភពព័ត៌មាន៖ Channel News Asia
