បរទេស៖ ប្រធានក្រុមហង្សក្រហម Liverpool កីឡាករ Jordan Henderson នឹងអាចអវត្តមានពីទីលានប្រកួតរហូតដល់ទៅ១២សប្តាហ៏ (៣ខែ) ដោយសារបញ្ហារបួសក្រលៀន។ កីឡាករវ័យ ៣០ឆ្នាំសញ្ជាតិអង់គ្លេសរូបនេះចូលលេងបានត្រឹមតែ ៣០ នាទីប៉ុណ្ណោះក្នុងជំនួបជាមួយក្លឹបរួមទីក្រុង Evertonកាលពីសប្តាហ៏មុន។
គេហទំព័រ The sun បានចុះផ្សាយថាៈកីឡាករដែលលេងតួនាទីនៅខ្សែបម្រើកណ្តាល កំពុងប្រឈមមុខនឹងបញ្ហាក្រលៀនដែលធ្ងន់ធ្ងរលើសពីការរំពឹងទុកទៅទៀត។ ដូច្នេះរូបគេនឹងមិនអាចវិលត្រឡប់ទៅហ្វឹកហាត់ពេញលេញវិញទេរហូតដល់ចុងខែឧសភានៅដើមឆ្នាំប្រសិនបើលទ្ធផលនៅថ្ងៃព្រហស្បត្ត៏បង្ហាញថាគាត់ត្រូវការវះកាត់។មានន័យថា Henderson និងត្រូវអវត្តមានរហូតដល់បញ្ចប់រដូវកាល និង ត្រូវតស៊ូដើម្បីជាប់កៅអីមួយក្នុងក្រុមជម្រើសជាតិសម្រាប់ចូលរួមព្រឹត្តការណ៏ Euro នាពេលខាងមុខផងដែរ។
រយៈពេលប៉ុន្មានខែចុងក្រោយនេះ Henderson បានបំពេញតួនាទីយ៉ាងសំខាន់ជាខ្សែការពារកណ្តាលក្រោយពីម្ចាស់ជើងឯកលីកកំពូលអង់គ្លេស មានវិបត្តិនៅតំបន់ខ្សែការពារយ៉ាងធ្ងន់ធ្ងរនោះ៕
ប្រភពព័ត៍មាន៖ Sportsmole
