បរទេស៖ ក្រុមបិសាចក្រហម Manchester United ត្រូវចំណាយប្រាក់ប្រមាណ ១០,០០០ ផោនទៅឱ្យក្រុមនៅលីកលំដាប់ទី៤ គឺ ក្រុម Carlisle United រាល់ពេលដែលអ្នកចាំទី Dean Henderson បង្ហាញខ្លួនចូលលេងជម្រើស១១នាក់ដំបូង។
គួរបញ្ជាក់ថាអ្នកចាំទីវ័យ ២៣ ឆ្នាំរូបនេះបានចូលហ្វឹកហាត់ក្នុងនាមយុវជនថ្នាលជាមួយក្រុម Man Utd ចាប់តំាងពីអាយុ ១៤ ឆ្នាំពីក្លឹប Carlisle United កាលពីខែសីហាឆ្នាំ ២០១១ ជាមួយកិច្ចព្រមព្រៀងមួយនៅតែផ្តល់ផលប្រយោជន៏ដល់ក្លឹបដើម។ យោងគេហទំព័រ The Sun បានចុះផ្សាយថានៅក្នុងកិច្ចសន្យានោះ Man Utd បានបញ្ជាក់ច្បាស់ៗ៥ចំនុចរាល់ពេលកីឡាកររូបនេះចូលលេងស្របពេលដែល Henderson បានបង្ហាញខ្លួនលេងអោយឈុតធំក្រោយជោគជ័យក្នុងការលេងខ្ចីជើងជាមួយក្រុម Sheffield United ។ មានន័យថា Henderson បានបង្ហាញខ្លួនជម្រើសដំបូងសរុបចំនួន ១៣ដងគ្រប់ក្របខណ្ឌប្រកួតទាំងអស់ដើម្បីប្រជែងជាមួយអ្នកចាំទី David de Gea នៅរដូវកាលនេះ។
ដូច្នេះក្រុម Carlisle បានទទួល ប្រាក់ឈ្នួលចំនួន ១៣០,០០០ ផោនហើយនៅស្របពេលក្លិបរំពឹងថានឹងទទួលបានប្រាក់បន្ថែមទៀត។មួយវិញទៀត Carlisle និងទទួលបានទឹកប្រាក់បន្ថែម ៥% បន្ថែមទៀតព្រោះនៅក្នុងកិច្ចព្រមព្រៀងបាននិយាយច្បាស់ប្រសិនកីឡាករដែលមានតម្លៃខ្លួនបច្ចុប្បន្ន ២០លានផោន ត្រូវបាន Man Utdលក់រូបគេចេញ៕
ប្រភពព័ត៍មាន៖ Sportsmole
