បេទេស៖ លោក Mauricio Pochettino គ្រូបង្វឹករបស់ក្រុម Paris St Germain បានបញ្ជាក់ថា ក្រុមម្ចាស់ជើងឯករបស់បារាំងមួយនេះ ត្រូវតែផ្តោតអារម្មណ៍ឲ្យបានស្មើគ្នាទៅលើរាល់ការប្រកួតដែលនៅសល់ទាំងអស់របស់ពួកគេ ក្នុងរដូវកាលក្របខ័ណ្ឌ Ligue ដែលមិនអាចព្យាករបាន។
ក្រុម PSG កំពុងតែស្ថិតក្នុងចំណាត់ថ្នាក់លេខ២ ដោយមាន៥៧ពិន្ទុ ពីការប្រកួត២៧លើក ដោយតាមពីក្រោយក្រុម Lille ចំនួន២ពិន្ទុ ខណៈដែលក្រុម Olympique Lyonnais កំពុងតែស្ថិតក្នុងចំណាត់ថ្នាក់លេខ៣ ដោយមាន៥៦ពិន្ទុ ហើយក្រុម Monaco ស្ថិតក្នុងចំណាត់ថ្នាក់លេខ៤ ដោយមាន៥៥ពិន្ទុ។ ក្រុម PSG ដែលនឹងត្រូវធ្វើដំណើរទៅប្រកួតជាមួយនឹងក្រុម Girondins de Bordeaux នៅរាត្រីនេះ នៅតែត្រូវប្រកួតជាមួយនឹងក្រុម Lyon នៅក្រៅដី ក្រុម Lille លើទឹកដីខ្លួនឯង នៅចុងរដូវកាលនេះ ប៉ុន្តែ លោក Pochettino បានតឿនរំឭកថា ការប្រកួតផ្សេងទៀតក៏សំខាន់ផងដែរ។
ទាក់ទងនឹងការរងបរាជ័យក្នុងលទ្ធផល ៣-២ នៅលើទឹកដីក្រុម Lorient កាលពីខែមករា លោក Pochettino បានប្រាប់សន្និសីទសារព័ត៌មានថា៖ «នៅរដូវកាលនេះ បានបង្កើតឲ្យមានលទ្ធផលគ្រប់ប្រភេទទាំងអស់ ហើយយើងទើបតែបានឃើញនាពេលថ្មីៗនេះ»។ គ្រូបង្វឹករូបនេះបានបន្ថែមទៀតថា៖ «ការប្រកួតនានាជាមួយនឹងគូប្រជែងដណ្តើមពានរបស់យើង នឹងក្លាយជាការប្រកួតកាត់សេចក្តី ប៉ុន្ត រដូវកាលនេះ កំពុងតែបង្ហាញឲ្យយើងឃើញថា អ្នកត្រូវតែផ្តោតអារម្មណ៍ទាំងស្រុងរាល់ការប្រកួតទាំងអស់»៕
ប្រភពព័ត៌មាន៖ Channel News Asia
