បរទេស៖ ខ្សែប្រយុទ្ធ Cristiano Ronaldo បានអបអរការបង្ហាញខ្លួនក្នុងការប្រកួតលីកលើកទី៦០០របស់គេ តាមរយៈការរកបានគ្រាប់បាល់ទី២០របស់គេក្នុងក្របខ័ណ្ឌ Serie A នៅរដូវកាលនេះ ខណៈដែលក្រុម Juventus បានផ្តួលក្រុម Spezia ៣-០ កាលពីថ្ងៃអង្គារ ដើម្បីដេញតាមពីក្រោយក្រុមឈរលេខ២ AC Milan ចំនួន៣ពិន្ទុ។
តារាឆ្នើមជើងចាស់អន្តរជាតិព័រទុយហ្គាល់រូបនេះ បានជួយឲ្យក្រុមខ្លួនរកបានគ្រាប់បាល់ទី៣នៅជិតបញ្ចប់ការប្រកួត ក្រោយពីខ្សែប្រយុទ្ធ Alvaro Morata និង Federico Chiesa បានស៊ុតបាល់បំប៉ោងសំណាញ់ទីនៅដើមតង់ទី២ ដើម្បីជួយឲ្យក្រុមរបស់លោក Andrea Pirlo ស្ថិតក្នុងទីតាំងដ៏រឹងមាំ។ Ronaldo ដែលក៏បានស៊ុតបាល់ប៉ះនឹងបង្គោលទី ក្នុងតង់ទី១ដែរនោះ ក្លាយជាកីឡាករដំបូងគេក្នុងការស៊ុតបាល់បញ្ចូលទីយ៉ាងហោចណាស់២០គ្រាប់ក្នុងរយៈពេល១២រដូវកាលចុងក្រោយនេះ នៅក្នុងក្របខ័ណ្ឌលីកកំពូលទាំង៥របស់អឺរ៉ុប។ ជ័យជម្នះនេះ ជួយឲ្យ Juventus ស្ថិតក្នុងចំណាត់ថ្នាក់លេខ៣ ដោយមាន៤៩ពិន្ទុ ពីការប្រកួត២៤លើក ដោយតាមពីក្រោយក្រុម AC Milan ដែលមាន៥២ពិន្ទុ និងក្រុមកំពុងនាំមុខ Inter ដែលមាន៥៦ពិន្ទុ ខណៈដែលក្រុមទាំង២ ក៏ត្រូវប្រកួតនៅសប្តាហ៍នេះផងដែរ ដោយត្រូវប៉ះក្រុម Udinese និង Parma រៀងៗខ្លួន។
Morata បានប្រាប់ទូរទស្សន៍ Sky Italia ថា៖ «ប្រសិនបើយើងមិនឈ្នះការប្រកួតនេះទេ ពេលចប់រដូវកាលនេះ យើងនឹងត្រូវអបអរសាទរដល់ក្រុមឈ្នះជាមិនខាន ប៉ុន្តែ យើងត្រូវតែលេងឲ្យខ្លាំងលើទីលានជាមុនសិនរហូតទាល់តែគេប្រាប់យើងថា លែងមានពិន្ទុដែលត្រូវដណ្តើមយកទៀតហើយ»៕
ប្រភពព័ត៌មាន៖ Channel new Asia