បរទេស៖ លោក Roy Hodgson បច្ចុប្បន្នគ្រូបង្វឹកក្រុម Crystal Palace បានជំរុញអោយកីឡាករ Aaron Wan-Bissaka រក្សាភាពអត់ធ្មត់របស់ខ្លួនមុនពេលសំរេចចិត្តថាចូលលេងអោយក្រុមជម្រើសជាតិណាមួយ។
ទោះយ៉ាងណាអតីតគ្រូបង្វឹកក្រុមជម្រើសជាតិអង់គ្លេសសារភាពថារូបលោកចង់ឃើញខ្សែការពារស្លាបស្តាំរូបនេះចូលលេងអោយអង់គ្លេស។ អតីតកីឡាករក្រុមស្ទាំងខៀវ Crystal Palace រូបនេះបានពិចារណាក្នុងការផ្លាស់ប្តូរក្រុមជម្រើសជាតិខ្លួនបន្ទាប់ពីធ្លាប់បង្ហាញខ្លួនលេងអោយសាធារណរដ្ឋកុងហ្គោក្នុងវ័យក្រោម២០ឆ្នាំក្នុងឆ្នាំ២០១៥ មុនពេលបង្ហាញខ្លួនចូលលេងសម្រាប់ក្រុមតោកំណាចអង់គ្លេសនៅឆ្នាំបន្ទាប់។
ដោយសារតែ Aron wan-Bissaka ដែលមានដើមកំណើតនៅតំបន់ Croydon ចក្រភពអង់គ្លេសរូបនេះមានភាពប្រកួតប្រជែងខ្លាំងសម្រាប់តំណែងស្លាបខាងស្តាំ ក៏ព្រោះតែមានមិត្តរួមជាតិដែលមានសមត្ថភាពដូចជា Kyle Walker, Kieran Trippier, Trent Alexander-Arnold, Reece James និង Ainsley Maitland-Niles ជាដើមនោះ។ ទោះយ៉ាងណាលោក Hodgson មានការកោតសរសើរកីឡាករវ័យ ២៣ឆ្នាំដែលរូបលោកធ្លាប់ដឹកនាំថា បានអភិវឌ្ឍសមត្ថភាពគួរកត់សម្គាល់ និងរីកចំរើនខ្លាំងក្រោមការដឹកនាំរបស់គ្រូបង្វឹកលោក Ole Gunnar Solskjaer៕
ប្រភពព័ត៍មាន៖ Sportsmole