បរទេស៖ ក្រុមបិសាចក្រហម Manchester United បានដេញតាមពីក្រោយក្រុម Manchester City នៅលើកំពូលតារាងក្របខ័ណ្ឌ Premier League រហូតដល់ទៅ១៤ពិន្ទុ ខណៈដែលក្រុម Crystal Palace បានធ្វើឲ្យពួកគេត្រឹមតែអាចទទួលបានលទ្ធផលស្មើ ០-០ មួយផ្សេងទៀត កាលពីថ្ងៃពុធ។
ការបញ្ចប់ក្នុងលទ្ធផលស្មើនៅកីឡដ្ឋាន Selhurst Park នេះគឺជាការទទួលបានលទ្ធផលស្មើជាលើកទី៣ជាប់ៗគ្នារបស់ក្រុម Man United ក្នុងរាល់ការប្រកួតទាំងអស់ នៅមុនពេលការប្រកួតរវាងក្រុមស្ថិតក្នុងទីក្រុង Manchester តែមួយនៅថ្ងៃអាទិត្យ ជាមួយនឹងក្រុម Man City ដែលបានកត់ត្រាជ័យជម្នះ២១លើកជាប់ៗគ្នា។ ស្របពេលជាមួយគ្នានេះ ក្រុមឈរលេខ៣ Leicester បានវាយតាមស្មើក្រុម Burnley ក្នុងលទ្ធផល ១-១ ទាំងត្រដាបត្រដួស តាមរយៈគ្រាប់បាល់របស់កីឡាករ Kasper Schmeichel។ ដោយឡែក ក្រុម Aston Villa បានខ្ជះខ្ជាយឱកាសក្នុងការកាត់បន្ថយការដេញតាមពីក្រោយក្រុមស្ថិតក្នុងចំណាត់ថ្នាក់លេខ៤ ឲ្យមកនៅត្រឹម២ពិន្ទុ ក្រោយពីពួកគេបានរងបរាជ័យក្នុងលទ្ធផល ១-០ ក្រោមស្នាដៃក្រុមបាតតារាង Sheffield United ដែលបានលេងការប្រកួតរយៈពេលកន្លះម៉ោងជាមួយនឹងសមាជិកត្រឹមតែ១០នាក់។
ខ្សែបម្រើ Nemanja Matic របស់ Man United ដែលស្ទើរតែរកបានគ្រាប់បាល់ទម្លុះសំណាញ់ទីនោះ បានប្រាប់ទូរទស្សន៍ Sky Sports ថា៖ «យើងត្រូវតែធ្វើឲ្យបានល្អប្រសើរជាងមុន។ យើងត្រូវតែប្រថុយបន្ថែមទៀតនៅតំបន់ប្រយុទ្ធ ដើម្បីបង្កើតឱកាសបន្ថែមទៀត»៕
ប្រភពព័ត៌មាន៖ Channel News Asia
