បរទេស៖ ក្រុម Barcelona ត្រូវលេងរហូតដល់នាទីបន្ថែម១៥នាទី២ដង ដើម្បីឈានទៅប្រកួតដណ្តើមពាន Copa del Rey វគ្គផ្តាច់ព្រ័ត្រ កាលពីថ្ងៃពុធ ខណៈដែលការដណ្តើមបានជ័យជម្នះក្នុងលទ្ធផល ៣-២ លើក្រុម Sevilla បានកើតឡើងត្រឹមតែរយៈពេល២ថ្ងៃប៉ុណ្ណោះ បន្ទាប់ពីក្រុមប៉ូលិសបានវាយឆ្មក់ចូលទៅកាន់ក្លិបនេះ និងបានឃាត់ខ្លួនអតីតប្រធានក្លិបរបស់ពួកគេផងដែរ។
ក្រោយពីបានដេញតាមពីក្រោយក្នុងលទ្ធផល ២-០ ពីការប្រកួតជើងទី១ ខ្សែប្រយុទ្ធ Ousmane Dembele បានជួយឲ្យក្រុមខ្លួនរកបានគ្រាប់បាល់នាំមុខមុន ក្រោយពីបានលេងបាន១២នាទី ក្នុងការប្រកួតជើងទី២។ ខ្សែការពារ Gerard Pique បានរកគ្រាប់បាល់តាមស្មើវិញនៅនាទី ទី៤នៃនាទីបន្ថែមនៃម៉ោងធម្មតា សម្រាប់ក្រុម Barca ដើម្បីបង្ខំឲ្យការប្រកួតឈានដល់នាទីបន្ថែម១៥នាទី២ដងដើម្បីកាត់សេចក្តីតែម្តង។ ក្រោយមក ខ្សែប្រយុទ្ធអន្តរជាតិដាណឺម៉ាក Martin Braithwaite បានរកគ្រាប់បាល់បញ្ចូលទីដ៏សំខាន់នៅនាទី ទី៥នៃនាទីបន្ថែម១៥នាទី២ដង ក្រោយពីការបញ្ជូនបាល់យ៉ាងល្អពីសំណាក់កីឡាករ Jordi Alba ដើម្បីបំពេញជ័យជម្នះសម្រាប់ក្រុមរបស់ខ្លួនតែម្តង។
ក្រុម Barcelona នឹងត្រូវប្រកួតជាមួយនឹងក្រុម Athletic Bilbao ឬLevante ដែលបានបញ្ចប់ក្នុងលទ្ធផលស្មើ ១-១ ក្នុងការប្រកួតវគ្គពាក់កណ្តាល ក្នុងជើងទី១របស់ពួកគេ នៅក្នុងវគ្គផ្តាច់ព្រ័ត្រនៅថ្ងៃទី១៧ ខែមេសា ក្នុងទីក្រុង Seville៕
ប្រភពព័ត៌មាន៖ Channel News Asia