បរទេស៖ លោក Ole Gunnar Solskjaer អ្នកចាត់ការទូទៅរបស់ក្រុម Manchester United បានបញ្ជាក់ថា វា «មិនមែនជារឿងត្រឹមត្រូវឡើយ» ដែលកីឡាកររបស់លោកត្រូវធ្វើដំណើរទៅបំពេញការតព្វកិច្ចអន្តរជាតិ នៅចុងខែនេះ ប្រសិនបើពួកគេត្រូវតែធ្វើចត្តាលីស័ក្ក ក្នុងពេលត្រឡប់មកវិញ និងអវត្តមានក្នុងការប្រកួតនោះ។
ការធ្វើដំណើរទៅចលចក្រភពអង់គ្លេស ពីប្រទេស «ស្ថិតក្នុងបញ្ជីក្រហម» នឹងត្រូវស្នាក់នៅដាច់ដោយឡែកពីគេរយៈពេល១០ថ្ងៃ។ ប្រទេសនៅអាមេរិកខាងត្បូង និងព័រទុយហ្គាល់ សុទ្ធសឹងស្ថិតក្នុងចំណោមប្រទេសដែលស្ថិតក្នុងបញ្ជីក្រហម ដែលមានន័យថា តារាឆ្នើមៗរបស់ក្លិប Man United ដូចជា ខ្សែបម្រើអន្តរជាតិព័រទុយហ្គាល់ Bruno Fernandes និងខ្សែប្រយុទ្ធអន្តរជាតិអ៊ុយរូហ្គាយ Edinson Cavani អាចនឹងត្រូវអវត្តមានក្នុងការប្រកួតជម្រុះ World Cup។ ជាមួយគ្នានេះ លោក Jurgen Klopp អ្នកចាត់ការទូទៅរបស់ Liverpool បានបញ្ជាក់ថា ក្លិបរបស់លោក ក៏នឹងដកកីឡាករមួយចំនួនផងដែរ ប្រសិនបើពួកគេត្រូវបង្ខំឲ្យធ្វើចត្តាលីស័ក្ក ដែលនាំឲ្យការចូលរួមរបស់កីឡាករប្រេស៊ីល៣នាក់រួមមាន Alisson Becker, Roberto Firmino និង Fabinho និងខ្សែប្រយុទ្ធព័រទុយហ្គាល់ កំពុងស្ថិតក្នុងភាពមិនច្បាស់។ ក្នុងស្ថានភាពជាធម្មតា ក្លិបនានា ត្រូវតែបញ្ចេញកីឡាករឲ្យបំពេញការតព្វកិច្ចអន្តរជាតិ នៅកាលបរិច្ឆេទជាក់លាក់។
ប៉ុន្តែ ទោះបីជាយ៉ាងណា FIFA បានអនុញ្ញាតឲ្យក្លិបនានា រក្សាទុកកីឡាករ ដែលអាចរងឥទ្ធិពលដោយសារតែបទបញ្ជានានា ពីការចូលរួមជាមួយនឹងក្រុមជម្រើសជាតិរបស់ខ្លួនក្នុងការប្រកួតផ្សេងៗ។ លោក Solskjaer បានឲ្យដឹងថា៖ «វាមិនមែនជារឿងត្រឹមត្រូវសោះក្នុងការធ្វើដំណើរ នៅពេលដែលយើងត្រូវបង់ការចំណាយរបស់ពួកគេ ប្រសិនបើពួកគេមកវិញ ហើយត្រូវអវត្តមានរយៈពេល១០ថ្ងៃ»៕
ប្រភពព័ត៌មាន៖ Channel News Asia