បរទេស៖ អ្នកចាត់ការទូទៅក្រុម Man City លោក Pep Guardiola បានបញ្ជាក់ប្រាប់បណ្តាញសារពត៌មានថាក្រុម Man Utd គឺជាគូប្រជែងដ៏លំបាកក្នុងការផ្តួលដែលការលើកឡើងនេះគឺពេលជំនួបរវាងក្លឹបទាំងពីរនៅថ្ងៃអាទិត្យនេះ។ អតីតគ្រូបង្វឹក Barcelona និង Bayern Munich បានសម្តែងអោយឃើញពីការស្រេកឃ្លានជ័យជំនះរបស់កូនក្រុមដោយសម្លឹងលើក ពាន Premier League ជាលើកទី ៣ ក្នុងរយៈពេល ៤ រដូវកាលចុងក្រោយ។
Man City បានបង្កើតកំនត់ត្រាដ៏ល្អបំផុតនៅរដូវកាលនេះក្រោយឈ្នះ ២១ លើកជាប់ៗគ្នាគ្រប់ក្របខណ្ឌប្រកួត ទាំងអស់ដោយពួកគេឈរនៅលើកំពូលតារាង Premier League និងមានគម្លាត ១៤ ពិន្ទុដាច់ពីក្រុមឈរលេខ ២ Man Utd ដែលទើបតែឈ្នះមួយលើកក្នុងចំណោមការប្រកួតលីក ៥ លើកចុងក្រោយនិងខ្សត់គ្រាប់បាល់បញ្ចូលទីថែមទៀតផងដែរ។
ទោះយ៉ាងណាអ្នកចាត់ការទូទៅសញ្ជាតិអេស្បាញទទួលស្គាល់ និងការប្រយ័ត្នប្រយែងចំពោះក្រុមរបស់លោក Ole Gunnar Solskjaer ដែលមិនធ្លាប់ស្គាល់ពាក្យថាចាញ់ក្រៅដីសម្រាប់ការប្រកួតក្នុងលីកជាងមួយឆ្នាំមកហើយ។ លោក Pep បានបញ្ជាក់ប្រាប់យ៉ាងដូច្នេះថា៖ «ខ្ញុំដឹងថាពួកគេ Man Utd លំបាកប៉ុណ្ណា។ហើយជារៀងរាល់ ឆ្នាំពួកគេកាន់តែប្រសើរឡើងពីរដូវកាលមុន។ ពួកគេតែងទទួលបានលទ្ធផលល្អនៅឯទឹកដី Etihad របស់យើង។ យ៉ាងណាមិញយើងមានឱកាសល្អក្នុងការបង្កើនគម្លាត។ ការហ្វឹកហាត់សំខាន់បំផុតជាអ្វីដែលយើងត្រូវធ្វើដើម្បីផ្តួលពួកគេ»៕
ប្រភពព័ត៍មាន៖ Besoccer