បរទេស៖ ក្រុមតោខៀវ Chelsea បានពង្រឹងទីតាំងរបស់ខ្លួនក្នុងចំណាត់ថ្នាក់លេខ៤ ក្នុងក្របខ័ណ្ឌ Premier League ខណៈដែលខ្សែបម្រើប្រយុទ្ធ Kai Havertz បានជួយឲ្យពួកគេដណ្តើមបានជ័យជម្នះដោយងាយក្នុងលទ្ធផល ២-០ លើក្រុម Everton ស្របពេលដែលក្រុម West Ham បានធ្វើឲ្យការប្រជែងដណ្តើមយកលេខ៤កាន់តែក្តៅគគុក តាមរយៈការយកឈ្នះលើក្រុម Leeds United ២-០ កាលពីថ្ងៃចន្ទ។
Havertz បានជួបភាពត្រដាបត្រដួសក្នុងរដូវកាលទី១របស់គេ ក្រោយពីការផ្ទេរក្នុងតម្លៃខ្លួន៧០លានផោន (ស្មើនឹង៩៦លានដុល្លារអាមេរិក) ពីក្លិប Bayer Leverkusen កាលពីឆ្នាំមុន។ ប៉ុន្តែ តារាឆ្នើមអន្តរជាតិអាល្លឺម៉ង់រូបនេះ ត្រូវបានដាក់ឲ្យចូលលេងក្នុងជម្រើសទាំង១១នាក់ដំបូងទាំងកម្រ ដោយគ្រូបង្វឹកនៃក្រុម Chelsea លោក Thomas Tuchel ហើយរូបគេបានតបស្នងវិញតាមរយៈការដើរតួនាទីដ៏សំខាន់ក្នុងការជួយឲ្យក្រុមខ្លួនរកបានគ្រាប់បាល់ទាំង២គ្រាប់នៅកីឡដ្ឋាន Stamford Bridge។ ការស៊ុតបាល់របស់ Havertz បានផ្លាតចូលទីរបស់ក្រុម Everton យ៉ាងល្អ ក្រោមការធ្វើឲ្យបាល់ចូលទីខ្លួនឯងពីសំណាក់កីឡាករ Ben Godfrey នៅតង់ទី១។
កីឡាករវ័យ២១ឆ្នាំរូបនេះ មិនធ្លាប់បានស៊ុតបាល់បញ្ចូលទីក្នុងការប្រកួតលីកសោះ បើគិតចាប់តាំងពីខែតុលា ប៉ុន្តែ លោក Tuchel បានដាក់ឲ្យរូបគេចូលលេងក្នុងតួនាទីដ៏សំខាន់ ហើយការបង្ហាញពីទម្រង់លេងដ៏ល្អរបស់ Havertz បានជួយឲ្យក្រុមខ្លួនទទួលបានបាល់ប៉េណាល់ទីនៅតង់ទី២ ដែលស៊ុតដោយកីឡាករ Jorginho។ លោក Tuchel បានឲ្យដឹងថា៖ «ខ្ញុំពិតជាពេញចិត្តនឹងទម្រង់លេងរបស់គេ និងគុណភាពដែលឥតលាក់បាំងរបស់គេ ក៏ដូចជាទេពកោសល្យ និងឥរិយាបថរបស់គេ»៕
ប្រភពព័ត៌មាន៖ Channel News Asia
