បរទេស៖ ក្រុមសេះបង្កង់ Juventus របស់ Cristiano Ronaldo បានធ្លាក់ចុះពីការប្រកួតក្របខ័ណ្ឌ Champions League វគ្គ១៦ក្រុមចុងក្រោយ ក្នុងរយៈពេល២ឆ្នាំជាប់ៗគ្នា កាលពីថ្ងៃអង្គារ ក្រោយពីចាញ់ក្រុមនៅសល់សមាជិកត្រឹមតែ១០នាក់ Porto ដោយសារតែគ្រាប់បាល់ក្រៅដី បើទោះបីដណ្តើមបានជ័យជម្នះក្នុងលទ្ធផល ៣-២ ក្នុងការប្រកួតជើងទី២ នៅទីក្រុង Turin ក៏ដោយ។
គ្រាប់បាល់បញ្ចូលទីពីការស៊ុតពិន័យ Free-kick របស់ខ្សែបម្រើ Sergio Oliveira បានជួយឲ្យក្រុមម្ចាស់ជើងឯក២សម័យកាល Porto ឈានទៅកាន់វគ្គ៨ក្រុមចុងក្រោយ ខណៈដែលការប្រកួតទាំង២ជើង បានបញ្ចប់ក្នុងលទ្ធផលស្មើ ៤-៤។ ក្រោយពីនាំមុខ ២-១ ពីការប្រកួតជើងទី១ ក្នុងប្រទេសព័រទុយហ្គាល់ គ្រាប់បាល់ស៊ុតបាល់ប៉េណាល់ទីនៅតង់ទី១របស់ Oliveira បានបន្ថែមគ្រាប់បាល់នាំមុខសម្រាប់ក្រុម Porto ប៉ុន្តែ ក្រុម Juventus បានតាមស្មើវិញ តាមរយៈគ្រាប់បាល់បញ្ចូលទីពីរគ្រាប់ពីកីឡាករ Federico Chiesa ខណៈដែលគ្រាប់បាល់នោះ បានកើតឡើងនៅចន្លោះពេលនៃការរងពិន័យកាតក្រហមរបស់កីឡាករ Mehdi Taremi។
បន្ទាប់មក Oliveira បានស៊ុតបាល់បំប៉ោងសំណាញ់ទីនៅនាទី ទី១១៥ ដែលជាការស៊ុតបាល់ចូលតាមប្រឡោះជើងរបស់ Ronaldo ខណៈដែល Adrien Rabiot បានវាយបក១គ្រាប់វិញសម្រាប់ក្រុម Juventus។ លទ្ធផលនេះមានន័យថា សំណាងអាក្រក់របស់ក្រុម Juventus ដែលមានតាំងពី២៥ឆ្នាំមុន នៅតែបន្ត ក្រោយពីបានធ្លាក់ចេញត្រឹមវគ្គ១៦ក្រុមចុងក្រោយក្នុងរយៈពេល២ឆ្នាំជាប់ៗគ្នា ក្រោយពីចាញ់ក្រុមបារាំង Lyon កាលពីរដូវកាលមុន៕
ប្រភពព័ត៌មាន៖ Channel News Asia
