បរទេស៖ លោក Jurgen Klopp អ្នកចាត់ការទូទៅរសប់ក្រុម Liverpool សង្ឃឹមថា ការផ្លាស់ប្តូរយុទ្ធនាការ នឹងជួយឲ្យក្រុមរបស់លោកធូរស្រាលចិត្តពីការធ្លាក់ចុះទម្រង់លេងយ៉ាងគំហុករបស់ពួកគេក្នុងក្របខ័ណ្ឌ Premier League ខណៈដែលការធ្លាក់ចុះនេះ បានធ្វើឲ្យឱកាសរបស់ពួកគេក្នុងការបញ្ចប់ក្នុងចំណាត់ថ្នាក់កំពូលទាំង៤ស្ថិតក្នុងភាពមិនច្បាស់។
ការរងបរាជ័យក្នុងការប្រកួតលីកនៅលើទឹកដីខ្លួនឯង៦លើកជាប់ៗគ្នា ដោយការបរាជ័យចុងក្រោយបំផុតបានកើតឡើងក្រោមស្នាដៃក្រុម Fulham កាលពីថ្ងៃអាទិត្យ បានធ្វើឲ្យក្រុម Liverpool ឃ្លាតកាន់តែឆ្ងាយពីការប្រជែងយកកៅអីទៅលេងក្នុងក្របខ័ណ្ឌ Champions League ក្រោយពីបានលេងការប្រកួតច្រើនជាងក្រុមដែលកំពុងតែមានចំណាត់ថ្នាក់ពីលើពួកគេ។ នៅរាត្រីនេះ ពួកគេនឹងត្រូវលេងការប្រកួតនៅទីក្រុង Budapest ម្តងទៀត ក្នុងនាមជាក្រុមម្ចាស់ផ្ទះទទួលក្រុម RB Leipzig ក្នុងការប្រកួតជើងទី២នៃក្របខ័ណ្ឌ Champions League វគ្គ១៦ក្រុមចុងក្រោយ បន្ទាប់ពីនាំមុខក្នុងលទ្ធផល ២-០ ពីជើងទី១។
ការមិនលេងនៅកីឡដ្ឋាន Anfield ដោយសារតែការរិតត្បិតការធ្វើដំណើរជុំវិញការឆ្លងវីរុសកូរ៉ូណា អាចនឹងផ្តល់ភាពធូរស្រាលដល់លោក Klopp ក្រោយពីការធ្លាក់ចុះទម្រង់លេងរបស់ក្រុមលោក។ អ្នកចាត់ការទូទៅសញ្ជាតិអាល្លឺម៉ង់រូបនេះ បានឲ្យដឹងថា៖ «ប្រសិនបើយើងឈានទៅវគ្គបន្ត ដែលមិនទាន់មានភាពច្បាស់លាស់ នោះអាចនឹងផ្តល់នូវការជឿជាក់។ បន្ទាប់មក យើងត្រូវប៉ះក្រុម Wolves ដែលជាក្រុមខ្លាំងមួយ ហើយបន្ទាប់មក យើងត្រូវសម្រាក២សប្តាហ៍ ដោយសារតែការប្រកួតក្នុងយុទ្ធនាការអន្តរជាតិ»៕
ប្រភពព័ត៌មាន៖ Channel News Asia