បរទេស៖ Liverpool បានផ្តួលក្រុម RB Leipzig យ៉ាងងាយ ដើម្បីឈានទៅប្រកួតក្របខ័ណ្ឌ Champions League វគ្គ៨ក្រុមចុងក្រោយ ក្រោយពីបានយកឈ្នះក្នុងលទ្ធផល ២-០ ក្នុងទីក្រុង Budapest កាលពីថ្ងៃពុធ ខណៈដែលលោកគ្រូបង្វឹក Jurgen Klopp បានបញ្ជាក់ថា លទ្ធផលនេះ នឹងជួយឲ្យក្រុមរបស់លោកទុកភាពសោកសៅនៃក្របខ័ណ្ឌ Premier League មួយឡែក។
សម្រាប់ការដណ្តើមបានជ័យជម្នះដូចកាលពីជើងទី១មួយនេះ ខ្សែប្រយុទ្ធ Mohamed Salah និង Sadio Mane បានស៊ុតបាល់បញ្ចូលទីម្តងទៀត នៅចន្លោះពេលត្រឹមតែ៤នាទី នៅតង់ទី២ ដើម្បីជួយឲ្យក្រុមហង្សក្រហមដណ្តើមបានជ័យជម្នះទាំង២ជើង ៤-០ និងរក្សាក្តីសង្ឃឹមរបស់ក្រុម Liverpool ក្នុងការសង្គ្រោះរដូវកាលដ៏ត្រដាបត្រដួសរបស់ខ្លួនក្នុងក្របខ័ណ្ឌលីកតាមរយៈការឈ្នះពាននៅអឺរ៉ុប។ ក្រោយពីការរងបរាជ័យ៦លើកជាប់ៗគ្នានៅកីឡដ្ឋាន Anfield និងធ្លាក់ទៅឈរក្នុងចំណាត់ថ្នាក់លេខ៨ នៅលើតារាងក្របខ័ណ្ឌ Premier League ក្រុមរបស់លោក Klopp ហាក់ដូចជាបង្ហាញពីការធូរស្បើយចិត្តពេលប្រកួតនៅក្រៅដី ខណៈដែលការប្រកួតជើងទី២នេះ ក៏ត្រូវបានរៀបចំឡើងនៅរដ្ឋធានីនៃប្រទេសហុងគ្រីផងដែរ ដោយសារតែការការហាមឃាត់ជុំវិញករណីឆ្លងវីរុសកូរ៉ូណា។
លោក Klopp បានប្រា់បទូរទស្សន៍ BT Sport ថា៖ «ពួកគេបានបង្ហាញពីទម្រង់លេងដ៏អស្ចារ្យ។ យើងត្រូវតែបំភ្លេច Premier League ដើម្បីមកទីនេះ និងព្យាយាមដណ្តើមលទ្ធផល»៕
ប្រភពព័ត៌មាន៖ Channel News Asia