បរទេស៖ លោក Jose Mourinho អ្នកចាត់ការទូទៅរបស់ក្រុម Tottenham ចង់អបអរឆ្នាំដ៏គួរឲ្យកត់សម្គាល់សម្រាប់ប្រធានក្លិបនៃក្លិប Spurs លោក Daniel Levy តាមរយៈការបញ្ចប់ការរង់ចាំយូរអង្វែងក្នុងការឈ្នះពានរបស់ពួកគេ។ នៅសប្តាហ៍នេះ គឺជាខួប២០ឆ្នាំ បើគិតចាប់តាំងពីលោក Levy បានចូលកាន់តំណែងនៅក្នុងក្លិប Tottenham ប៉ុន្តែ លោកបានឃើញការឈ្នះពានត្រឹមតែ១លើកគត់ ពោលគឺការឈ្នះពាន League Cup ឆ្នា២០០៨។
ក្រុម Tottenham នឹងឈានទៅកាន់ការប្រកួតដណ្តើមពាន League Cup វគ្គផ្តាច់ព្រ័ត្រ ដោយពួកគេត្រូវប៉ះជាមួយនឹងក្រុម Manchester City ដែលកំពុងតែនាំមុខលើកំពូលតារាង Premier League នៅខែមេសា ខាងមុខនេះ ហើយក៏នឹងត្រូវជួបប្រកួតជាមួយនឹងក្រុម Dinamo Zagreb ក្នុងការប្រកួតជើងទី១នៃក្របខ័ណ្ឌ Europa League វគ្គ១៦ក្រុមចុងក្រោយ នៅរាត្រីនេះ ផងដែរ។ លោក Mourinho ដែលបានឈ្នះពានដល់ទៅ២៤ ក្នុងនាមជាគ្រូបង្វឹករបស់ក្លិប Porto, Chelsea, Inter Milan, Real Madrid និង Manchester United នោះបានឲ្យដឹងថា៖ «ខ្ញុំគិតថា ពេលខ្លះជារឿងយុត្តិធម៌ក្នុងការកាត់សេចក្តីទៅលើការឈ្នះពាននានា»។
លោកបានបន្ថែមទៀតថា៖ «ប៉ុន្តែ ពានគឺជាអំបិល និងម្ទេសនៃកីឡាបាល់ទាត់ ហើយខ្ញុំចង់ឈ្នះដើម្បីគាត់ ប៉ុន្តែ មិនមែនត្រឹមតែគាត់ទេ ក៏សម្រាប់កីឡាករ អ្នកគាំទ្រ និងគ្រប់គ្នាផងដែរ»៕
ប្រភពព័ត៌មាន៖ Channel News Asia
