បរទេស៖ គ្រូបង្វឹករបស់ក្លិប Real Madrid លោក Zinedine Zidane បានបដិសេធ និងច្រានចោលនៅពាក្យចរចាមរាមដែលថា Cristiano Ronaldo នឹងវិលត្រឡប់មកចូលរួមជាមួយនឹង Real Madrid សារជាថ្មី។
កិច្ចសន្យាបច្ចុប្បន្នរបស់ Ronaldo នឹងត្រូវផុតកំណត់នៅចុងបញ្ចប់នៃរដូវកាលក្រោយ ហើយប្រធានក្លិប Juventus លោក Fabio Paratici បានបង្ហើបថាបច្ចុប្បន្នក្លឹបមិនបានពិចារណាអំពីការពង្រីកកុងត្រារបស់កីឡាកររូបនេះឡើយ។ Ronaldo រកបាន ៤៥០ គ្រាប់ក្នុងការបង្ហាញខ្លួន ៤៣៨ លើកសម្រាប់ Madrid ចន្លោះឆ្នាំ ២០០៩ និង ២០១៨ ដោយឈ្នះពាន La Liga ២ដង និង Champions League ៤ដង មុនផ្លាស់ទៅទឹកដី Turin។
កីឡាករអន្តរជាតិព័រទុយហ្កាល់រូបនេះកំពុងត្រូវបានផ្សារភ្ជាប់ជាមួយនឹងការវិលត្រឡប់មកកាន់ទឹកដី Bernabeu វិញ ប៉ុន្តែលោក Zidane បានចេញមកបដិសេធលើព័ត៍មានទាំងនេះ។ លោក Zidane បាននិយាយប្រាប់អ្នកសារព័ត៍មានថា «អ្នកដឹងហើយថាគាត់ (CR7) គឺនរណា, អ្វីដែលគាត់បានសម្រេច និងក្តីស្រឡាញ់របស់យើងចំពោះគាត់។ គាត់បានបង្កើតប្រវត្តិសាស្ត្រនៅទីនេះ, គាត់គឺអស្ចារ្យខ្លាំងណាស់។ ឥឡូវនេះគាត់គឺជាកីឡាកររបស់ Juventus ហើយខ្ខ្ញុំមិនអាចប្រាប់អ្នកពីអ្វីដែលពួកគេ (បណ្តាញសង្គម) កំពុងនិយាយបានទេ។ គាត់គឺជាកីឡាកររបស់ Juventus ហើយខ្ញុំគោរពលើអ្វីទាំងអស់នោះ»។ Ronaldo នៅតែបង្ហាញទម្រង់លេងគួរឱ្យចាប់អារម្មណ៍សម្រាប់ក្លឹបបច្ចុប្បន្នរបស់គាត់ ទោះបីជាវ័យរាងច្រើនបន្តិចមែន ដោយគាត់អាចរកបាន ៩២គ្រាប់ក្នុងការបង្ហាញខ្លួន១២១លើក ក្នុងនោះមាន២៧គ្រាប់ក្នុង៣២ប្រកួតនៅរដូវកាល ២០២០-២១នេះ៕
ប្រភពព័ត៍មាន៖ Sportsmole
