បរទេស៖ លោក Pele កាលពីថ្ងៃអាទិត្យ បានអបអរសាទរដល់តារាឆ្នើម Cristiano Ronaldo ចំពោះការបំបែកកំណត់ត្រារបស់លោកនៅក្នុងការរកគ្រាប់បាល់ក្នុងការប្រកួតជាផ្លូវការ។
តារាឆ្នើមអន្តរជាតិព័រទុយហ្គាល់ Ronaldo បានស៊ុតបាល់បញ្ចូលទី៣គ្រាប់សម្រាប់ក្រុម Juventus ក្នុងពេលពួកគេទទួលបានជ័យជម្នះក្នុងលទ្ធផល ៣-១ លើក្រុម Cagliari ក្នុងការប្រកួតក្របខ័ណ្ឌ Serie A ដើម្បីធ្វើឲ្យគ្រាប់បាល់សរុបរបស់គេកើនដល់៧៧០គ្រាប់។ ខ្សែប្រយុទ្ធដែលមានវ័យ៣៦ឆ្នាំរូបនេះ បានប្រើប្រាស់បណ្តាញសង្គម Instagram ដើម្បីប្រាប់ដល់អ្នកគាំទ្រជាង២៧០លាននាក់របស់គេថា ពេលនេះ រូបគេអាចបំបែកកំណត់ត្រាបានហើយ ក្រោយពីបានតាមស្មើកំណត់ត្រារបស់លោក Pele តាមរយៈរកគ្រាប់បាល់បានសរុប៧៦៧គ្រាប់ កាលពីថ្ងៃទី២ ខែមីនា។
Ronaldo បានសរសេរថា៖ «ខ្ញុំពិតជារំភើបណាស់ និងមានមោទនភាព ខណៈដែលខ្ញុំបានដឹងថា គ្រាប់បាល់នោះធ្វើឲ្យខ្ញុំឈរលើកំពូលតារានៃបញ្ជីអ្នករកបានគ្រាប់បាល់ច្រើនជាងគេក្នុងពិភពលោក ដោយបានបំបែកកំណត់ត្រារបស់លោក Pele។ នេះគឺជាសមិទ្ធផលដែលខ្ញុំមិនធ្លាប់បានសុបិនទុកកាលពីវ័យក្មេងឡើយ»។ វីរបុរសបាល់ទាត់របស់ប្រេស៊ីលលោក Pele បានរសរសេរនៅលើបណ្តាញសង្គម Instagram ដើម្បីប្រាប់អ្នកគាំទ្រជាង៥,៨លាននាក់របស់លោកថា៖ «សូមអបអរសាទរដល់ការបំបែកកំណត់ត្រានៃការរកគ្រាប់បាល់របស់ខ្ញុំក្នុងការប្រកួតផ្លូវការ។ ខ្ញុំពិតជាសរសើរដល់អ្នកខ្លាំងណាស់។ ខ្ញុំពិតជាពេញចិត្តក្នុងការមើលអ្នកលេង ហើយនេះមិនមែនជារឿងអាថ៌កំបាំងសម្រាប់នរណាម្នាក់ឡើយ»៕
ប្រភពព័ត៌មាន៖ Channel News Asia
