បរទេស៖ ខ្សែប្រយុទ្ធ Lautaro Martinez បានស៊ុតបាល់បញ្ចូលទី២គ្រាប់ ខណៈដែលក្រុម Inter Milan ផ្តួលក្រុមជាគូប្រជែងក្នុងទីក្រុងតែមួយ AC Milan ក្នុងលទ្ធផល ៣-០ កាលពីថ្ងៃអង្គារ ដើម្បីឈានទៅប្រកួតដណ្តើមពាន Italian Cup វគ្គផ្តាច់ព្រ័ត្រ ដោយពួកគេនឹងត្រូវប៉ះជាមួយនឹងក្រុម Juventus ឬ Fiorentina។
ការប្រកួតវគ្គពាក់កណ្តាលផ្តាច់ព្រ័ត្រ ជើងទី២ មានភាពស្វិតស្វាញជាងការរំពឹងទុកទៅទៀត ប៉ុន្តែ ទីបំផុត Inter ដណ្តើមបានជ័យជម្នះយ៉ាងកក់ក្តៅក្នុងការប្រកួតទាំង២ជើង ក្រោយពីបានបញ្ចប់ក្នុងលទ្ធផលស្មើ ០-០ ក្នុងការប្រកួតជើងទី១។ ក្រុមរបស់លោក Simone Inzaghi នឹងឈានទៅប៉ះជាមួយនឹងក្រុមឈ្នះពីការប្រកួតវគ្គពាក់កណ្តាលផ្តាច់ព្រ័ត្រមួយគូទៀតនៅថ្ងៃពុធនេះ ដោយក្រុម Juventus កំពុងតែនាំមុខ ១-០ ក្រោយពីការប្រកួតជើងទី១ នាកីឡដ្ឋាន Stadio Olimpico នៅថ្ងៃទី១១ ខែឧសភា។
AC Milan នៅតែមិនទាន់ស្គាល់ការឈ្នះពានសោះ បើគិតចាប់តាំងពីបានឈ្នះពានក្របខ័ណ្ឌ Serie A ឆ្នាំ២០១១ ប៉ុន្តែ នៅមិនទាន់បាត់បង់ឱកាសក្នុងការដណ្តើមពានក្របខ័ណ្ឌលីកដែលមានឈ្មោះថា Scudetto មួយនេះ នៅរដូវកាលនេះ។ ក្រុម AC Milan របស់លោក Stefano Pioli កំពុងនាំមុខលើក្រុម Inter ចំនួន២ពិន្ទុលើតារាង បើទោះបីក្រុមម្ចាស់ការពារតំណែងជើងឯកមួយនេះ នៅសល់១ប្រកួតក្នុងដៃក៏ដោយ៕
ប្រភពព័ត៌មាន៖ Channel News Asia
