បរទេស៖ លោក Simone Inzaghi អ្នកចាត់ការទូទៅរបស់ក្រុម Inter Milan បានបញ្ជាក់កាលពីថ្ងៃអង្គារថា ការអសមត្ថភាពរបស់ក្រុមលោកក្នុងការផ្តួលគូប្រកួតក្នុងទីក្រុងតែមួយ AC Milan ក្នុងជំនួប៣លើកក្នុងរដូវកាលនេះ នឹងក្លាយជាកត្តាលើកទឹកចិត្តដ៏ធំមួយផ្សេងទៀត នៅពេលដែលពួកគេជួបគ្នាក្នុងការប្រកួតជើងទី២ក្នុងពាន Coppa Italia វគ្គពាក់កណ្តាលផ្តាច់ព្រ័ត្រ។
ក្រុមទាំង២ បានបញ្ចប់ក្នុងលទ្ធផលស្មើ ក្នុងការជួបគ្នាជាលើកដំបូងក្នុងការប្រកួតក្របខ័ណ្ឌលីគរបស់ពួកគេ កាលពីខែវិច្ឆិកា ស្របពេលដែលក្រុម AC Milan ដណ្តើមបានជ័យជម្នះក្នុងជំនួបជាលើកទី២ នៅមុនពេលពួកគេបានបញ្ចប់ក្នុងលទ្ធផលស្មើ ០-០ ក្នុងការប្រកួតជើងទី១ កាលពីខែមុន។ នៅមុនពេលការប្រកួតជើងទី២នៅរាត្រីនេះ លោក Inzaghi បានប្រាប់អ្នកយកព័ត៌មានថា៖ «ក្រុមនេះ ពោរពេញដោយការស្រេកឃ្លាន និងការលើកទឹកចិត្ត។ យើងដឹងពីសារសំខាន់នៃការប្រកួតនេះ និងដឹងថា វាមានន័យកម្រិតណាចំពោះក្លិបនេះ និងអ្នកគាំទ្រ»។
គ្រូបង្វឹករូបនេះបានបន្ថែមទៀតថា៖ «ការជួបគ្នា៣លើក បានបញ្ចប់ក្នុងលទ្ធផលខុសគ្នាទាំងអស់។ យើងលេងបានយ៉ាងល្អ ក្នុងការប្រកួត២លើកដំបូង ប៉ុន្តែ ក្រុមទាំងបានផ្តល់ការខកចិត្តដល់គ្នាទៅវិញទៅមកក្នុងការប្រកួតចុងក្រោយ ដោយដឹថា នឹងមានការប្រកួតជើងទី២ទៀត និងគ្រាប់បាល់ក្រៅដីដ៏សំខាន់»៕
ប្រភពព័ត៌មាន៖ Channel News Asia
