ក្រុមព្រះខ័នរាជស្វាយរៀង បានបង្ហាញទម្រង់លេងកាន់តែល្អ ដើម្បីលត់ក្រុមអគ្គិសនីកម្ពុជា យ៉ាងចាស់ដៃ សម្រាប់ការប្រកួតបើកឆាកលីគកំពូលកម្ពុជា នៅលើទឹកដីរបស់ខ្លួនឯងកាលពីថ្ងៃសៅរ៍ ប៉ុន្តែក្រុមគិរីវង់សុខសែនជ័យ មិនអាចយកកម្លាំងចិត្ត ដែលកើតចេញពីការយកឈ្នះក្រុមអាស៊ីអឺរ៉ុប ដើម្បីទៅបន្តយកឈ្នះលើក្រុមអង្គរថាយហ្គឺរ សម្រាប់ការប្រកួត នៅក្រៅទឹកដី កាលពីថ្ងៃអាទិត្យ ម្សិលមិញ នោះទេ។
បើទោះបីជាក្រុមប្រើកីឡាករក្នុងស្រុកសុទ្ធ អគ្គិសនីកម្ពុជា មានទឹកចិត្តពុះកញ្រ្ជោលខ្លាំង ក្នុងការប្រកួត ដែលកើតចេញពីការយកឈ្នះក្រុមនគរបាលជាតិ ៣-២ ក្នុងការប្រកួតបើកឆាក ប៉ុន្តែក្រុមរបស់លោក មាស សំអឿន មួយនេះ មិនអាចប្រើទម្រង់លេងការពារ ដើម្បីទប់មហិច្ឆតារកគ្រាប់បាល់របស់ក្រុមម្ចាស់ផ្ទះ ព្រះខ័នរាជស្វាយរៀង បាននោះទេ ខណៈខ្សែប្រយុទ្ធជនជាតិកាមេរ៉ូន Privat នៅតែជាកីឡាករ ដែលមានភាពលេចធ្លោរខ្លាំងជាងគេ ដោយរូបគេរកបាន២គ្រាប់តែម្នាក់ឯង និងបង្កើតឱកាសឱ្យមិត្តរួមក្រុមរកបាន៣គ្រាប់ទៀត ក្នុងជ័យជម្នះលើក្រុមអគ្គិសនីកម្ពុជា ៦-១។
ត្រឹមរយៈពេលត្រឹម៣១នាទី ក្រុមស្វាយរៀង អាចទម្លុះសំណាញ់ទីក្រុមអគ្គិសនីកម្ពុជា រហូតដល់៤គ្រាប់ ដែលគ្រាប់បាល់ទី១ រកបានដោយការទាត់ហ្រ្វីឃីកពីប្រធានក្រុម សឿយ វិសាល នៅនាទីទី៧ ហើយការលើកបាល់យ៉ាងស្អាតរបស់ Privat បានផ្តល់ឱកាសឱ្យខ្សែ ប្រយុទ្ធអេស្ប៉ាញ Miguel Angel Junco Martinez លោតតែតបាល់នោះ បញ្ចូលទីបានយ៉ាងល្អ នៅនាទីទី១៩ មុនពេល ប្រាក់ មុនីឧត្តម រកបាន១គ្រាប់ទៀត នៅនាទីទី២៩ ចំណែកនៅនាទីទី៣១ Private បានអូលបាល់ឆ្លងកាត់ខ្សែការពារក្រុមអគ្គិសនីកម្ពុជាដោយខ្លួនឯង រួចបានស៊ុតបញ្ចូលទីយ៉ាងស្អាត។
នៅក្រោយការនាំមុខ ៤-០ នេះ កីឡាករ សា ទី បានស៊ុតទម្លុះសំណាញ់ទីក្រុមម្ចាស់ផ្ទះ ស្វាយរៀង បាន១គ្រាប់វិញ នៅនាទីទី៣៥ ប៉ុន្តែឈានចូលតង់ទី២ ក្រុមស្វាយរៀង រកបាន២គ្រាប់បន្ថែមទៀត ដែលជាការរកបានគ្រាប់បាល់ទី២របស់ Miguel Angel Junco Martinez នៅនាទីទី៦៧ និងខ្សែប្រយុទ្ធឆ្នើម Privat នៅនាទីទី ៩០+១។
ក្រុមព្រះខ័នរាជស្វាយរៀង បានបង្ហាញការសប្បាយរីករាយខ្លាំង និងបានចាត់ទុកការយកឈ្នះលើក្រុមអគ្គិសនីកម្ពុជា រហូតដល់ ៦-១ លើកនេះ ថា ជាជ័យជម្នះដ៏ធំ ដោយក្រុមជើងឯករងមួយនេះ បានសរសេរបង្ហោះនោះផេចហ្វេសប៊ុករបស់ខ្លួនថា៖ «វាជាការឈ្នះដ៏ធំ សម្រាប់ការចាប់ផ្ដើមរដូវកាលរបស់យើង!»។
ផ្ទុយពីនេះ ក្រុមគិរីវង់សុខសែនជ័យ មិនអាចយកឈ្នះលើក្រុមម្ចាស់ផ្ទះ អង្គរថាយហ្គឺរ ដើម្បីនាំយក៣ពិន្ទុ ត្រឡប់ទៅផ្ទះវិញ ដូចការប្តេជ្ញាចិត្ត មុនការប្រកួតបាននោះទេ គឺពួកគេបានចាញ់ក្រុមម្ចាស់ផ្ទះ អង្គរថាយហ្គឺរ ២-០ ដែល២គ្រាប់នេះ រកបានដោយកីឡាករ តាំង ពិសី នៅនាទីទី៤ និង ឡុង ម៉េងហាវ នៅនាទីទី៦៤។ ការចាញ់នេះ បានធ្វើឱ្យក្រុមគិរីវង់ ធ្លាក់ពីលេខ២ មកឈរនៅលេខ៣វិញ ដោយមាន៣ពិន្ទុដដែល។
ចំណែកក្រុមព្រះខ័នរាជស្វាយរៀង ដែលបានឈ្នះក្រុមអគ្គិសនីកម្ពុជា ៦-១ កាលពីថ្ងៃសៅរ៍ បានឡើងទៅឈរនៅលេខរៀងទី២ ស្របពេលដែលការប្រកួតរបស់ក្រុមកំពុងឈរនៅលើកំពូលតារាង ភ្នំពេញក្រោន ក្រុមឈ្នះ៣ពិន្ទុថ្ងៃបើកឆាក ណាហ្គាវើល រួមទាំងក្រុមមាន១ពិន្ទុ ខេត្តព្រៃវែង វិសាខា និងក្រុមកងយោធពលខេមរភូមិន្ទ (ទ័ព) ព្រមទាំងក្រុមចាញ់ថ្ងៃបើកឆាក បឹងកេត នគរបាលជាតិ អាស៊ីអឺរ៉ុប និងសូលទីឡូអង្គរ សុទ្ធតែត្រូវបានលើកពេលប្រកួត ដោយសារវិបត្តិជំងឺកូវីដ១៩នោះ៕