បរទេស៖ លោក Jurgen Klopp បានបញ្ជាក់ថា លោកពិតជាពេញចិត្តនឹងការដណ្តើមបាន «៣ពិន្ទុទាំងត្រដាបត្រដួស» ខណៈដែលខ្សែប្រយុទ្ធ Diogo Jota បានវិលទៅផ្តល់ការខកចិត្តដល់ក្រុម Wolves តាមរយៈការរកគ្រាប់បាល់ឈ្នះតែ១គ្រាប់ ក្នុងពេលក្រុមខ្លួនដណ្តើមបានជ័យជម្នះក្នុងលទ្ធផល ១-០ នៅកីឡដ្ឋាន Molineux កាលពីថ្ងៃចន្ទ។
ការរងបរាជ័យក្នុងការប្រកួតលីកលើទឹកដីខ្លួនឯង៦លើកជាប់ៗគ្នា បានធ្វើឲ្យក្រុម Liverpool ប្រឈមមុខនឹងការងារដ៏លំបាកមួយ ក្នុងការប្រជែងយកកៅអីទៅកាន់ក្របខ័ណ្ឌ Champions League នៅរដូវកាលក្រោយ។ ប៉ុន្តែ បច្ចុប្បន្នក្រុមរបស់លោក Klopp បានដណ្តើមបានជ័យជម្នះ៦លើកក្នុងចំណោមការប្រកួតក្រៅដី៧លើកចុងក្រោយរបស់ពួកគេ។ ជ័យជម្នះនេះ បានធ្វើឲ្យក្រុមហង្សក្រហម Liverpool វិលទៅកាន់ចំណាត់ថ្នាក់លេខ៦វិញ និងដេញតាមពីក្រោយក្រុមឈរលេខ៤ Chelsea ចំនួន៥ពិន្ទុ។
លោក Klopp បានឲ្យដឹងថា៖ «វាអាស្រ័យទៅលើលទ្ធផល។ នេះគឺជាការប្រកួតដ៏ធំមួយ។ យើងបានឈ្នះ៣ពិន្ទុទាំងលំបាក ហើយខ្ញុំពិតជាពេញចិត្តនឹងលទ្ធផលនេះ។ យើងត្រូវតែជ័យជម្នះនេះ ដើម្បីវិលទៅកាន់ភាពខ្លាំងវិញ»៕
ប្រភពព័ត៌មាន៖ Channel News Asia
