បរទេស៖ លោក Zinedine Zidane បានបើកចំហទ្វារស្វាគមន៍ការវិលត្រឡប់របស់ខ្សែប្រយុទ្ធ Cristiano Ronaldo ទៅកាន់ក្លិប Real Madrid វិញ តាមរយៈការទទួលស្គាល់កាលពីថ្ងៃចន្ទ ថា ការវិលត្រឡប់របស់គេ «អាចនឹងកើតឡើង»។
នៅពេលដែលត្រូវបានចោទសួរដោយទូរទស្សន៍ Sky Italia ថា ពិតមានពាក្យចរចាមអារ៉ាមថា Ronaldo អាចនឹងចូលរួមជាមួយនឹងក្លិប Real Madrid ឬយ៉ាងណា លោក Zidane បានឆ្លើយតបថា៖ «វាអាចទៅរួច វាពិតជាអាចទៅរួច»។ គ្រូបង្វឹករូបនេះបានបន្ថែមទៀតថា៖ «យើងស្គាល់ Cristiano។ យើងស្គាល់អត្តចរិតរបស់គេ និងរាល់អ្វីៗដែលរូបគេសម្រេចបាននៅក្លិប Real Madrid។ ប៉ុន្តែ បច្ចុប្បន្ន រូបគេគឺជាកីឡាករម្នាក់របស់ក្លិប Juventus ហើយអ្នកត្រូវតែគោរពទាំងរូបគេ និងក្លិបនេះ»។ នៅពេលដែលត្រូវបានចោទសួរថា លោកចង់ធ្វើជាគ្រូបង្វឹករបស់ Ronaldo ម្តងទៀតដែរ ឬទេ លោក Zidane បានឆ្លើយថា៖ «ខ្ញុំបានធ្វើអ្វីដែលត្រូវតែធ្វើជាមួយនឹង Cristiano។ យើងរង់ចាំមើលថា នឹងមានអ្វីកើតឡើង នៅថ្ងៃអនាគត»។
ព័ត៌មាននានានៅក្នុងប្រទេសអេស្ប៉ាញ បានចេញផ្សាយថា Ronaldo ចង់វិលទៅកាន់ក្លិប Real Madrid វិញ ក្រោយពីទទួលបានជោគជ័យដ៏ធំធេងរយៈពេល៩ឆ្នាំជាមួយនឹងក្លិបនេះ មុននឹងចាកចេញកាលពីឆ្នាំ២០១៨ ក្នុងតម្លៃខ្លួន១០០លានអឺរ៉ូ៕
ប្រភពព័ត៌មាន៖ Channel News Asia
