បរទេស៖ លោក Thomas Tuchel បានទទួលស្គាល់ថា ក្រុម Chelsea បានទទួលនូវការមានប្រៀបដ៏ធំមួយ តាមរយៈការមិនតម្រូវឲ្យធ្វើដំណើរទៅក្រៅប្រទេសដើម្បីប្រកួតជើងទី២នៃក្របខ័ណ្ឌ Champions League វគ្គ១៦ក្រុមចុងក្រោយ ជាមួយនឹងក្រុម Atletico Madrid នៅរាត្រីនេះ។ ការប្រកួតជើងទី១រវាងក្រុមកំពុងតែនាំមុខលើតារាងលីក La Liga មួយនេះ និងក្រុមតោខៀវ Chelsea ត្រូវបានរៀបចំនៅរដ្ឋធានី Bucharest របស់រ៉ូម៉ានី ដោយសារតែការរិតត្បិតជុំវិញករណីឆ្លងវីរុសកូរ៉ូណា។
ការប្រកួតទាំង២ជើងរវាងក្រុម Liverpool និង RB Leipzig ក៏ដូចជាជំនួបរវាងក្រុម Manchester City និង Borussia Moenchengladbach សុទ្ធសឹងបានប្រព្រឹត្តទៅនៅទីក្រុង Budapest។ ប៉ុន្តែ ទោះបីជាយ៉ាងណា ក្រុម Chelsea នឹងត្រូវការពារការនាំមុខក្នុងលទ្ធផល ១-០ របស់ពួកគេ នៅកីឡដ្ឋាន Stamford Bridge បើទោះបីការប្រកួតនេះ នឹងត្រូវប្រកួតនៅកីឡដ្ឋានដែលគ្មានអ្នកទស្សនាក៏ដោយ។ លោក Tuchel គ្រូបង្វឹករបស់ក្រុម Chelsea បានឲ្យដឹងថា៖ «យើងមានប្រៀបក្នុងការលេងលើទឹកដីខ្លួនឯង។
យើងមិនចាំបាច់ធ្វើដំណើរទៅក្រៅដីប្រទេសឡើយ។ នេះគឺជារឿងល្អសម្រាប់យើង។ យើងមានអារម្មណ៍រីករាយ ក្នុងការស្ថិតក្នុងសណ្ឋាគាររបស់យើង នៅមុនពេលការប្រកួតនេះ ដើម្បីលេងការប្រកួតជាធម្មតា ហើយនេះគឺជាការមានប្រៀបដ៏ធំមួយសម្រាប់ថ្ងៃស្អែកនេះសម្រាប់ក្រុមរបស់យើង»៕
ប្រភពព័ត៌មាន៖ Channel News Asia