បរទេស៖ កីឡាករមានកំនត់ត្រារកគ្រាប់បាល់បានច្រើនបំផុតសម្រាប់ស៊ុយអែតគឺខ្សែប្រយុទ្ធចាស់វស្សា Zlatan Ibrahimovic ត្រូវបានក្រុមជម្រើសជាតិកោះហៅអោយមកជួយក្រុមសាជាថ្មី ពោលគឺ៥ ឆ្នាំបន្ទាប់ពីអតីតខ្សែប្រយុទ្ ធPSG, Man Utd និង Barcelona រូបនេះប្រកាសចូលនិវត្តន៍រួចមក។
បច្ចុប្បន្នទោះបីជាមានវ័យជ្រេដល់ទៅ ៣៩ ឆ្នាំទៅហើយក្តី ប៉ុន្តែកីឡាករដែលចាប់ផ្តើមអាជីពដំបូងជាមួយក្រុម Malmo រូបនេះរកបានគ្រាប់បាល់ ៦២ គ្រាប់ក្នុងការប្រកួតលក្ខណៈអន្តរជាតិសម្រាប់ស៊ុតអ៊ែតចំនួន ១១៦ប្រកួត មុនពេលសម្រេចចិត្តលាឈប់ក្រោយពីមិនអាចជួយក្រុមឆ្លងផុតវគ្គជម្រុះក្នុងពូលសម្រាប់ព្រឹត្តការណ៏ពានរង្វាន់ទ្វីបអឺរ៉ុប Euro ២០១៦ រួចមក។
ខ្សែប្រយុទ្ធដែលមានជំនាញអាចប្រើប្រាស់ជើងឆ្វេងនិងស្តាំរូបនេះផងដែរធ្លាប់បានបង្ហើបអំពីឪកាសវិលត្រលប់មកជួយជម្រើសជាតិកំលុងពេលផ្តល់បទសម្ភាសន៍ជាមួយសារពត៌មាននៅក្នុងខែវិច្ឆិកាឆ្នាំ ២០២០។ ខណៈដែលគ្រូបង្វឹកជម្រើសជាតិ ស៊ុយអែតលោក Janne Andersson ក្រោយមកក៏បានធ្វើដំណើរទៅកាន់ទីក្រុងមីឡានប្រទេសអ៊ីតាលី ដើម្បីបើកកិច្ចពិភាក្សាជាមួយ Zlatan ពេលនោះតែម្តង។ យ៉ាងណាមិញ Ibrahimovic រកបាន ១៤ គ្រាប់ក្នុងការបង្ហាញខ្លួន ១៤ ប្រកួតនៅលីកកំពូឡអ៊ីតាលី Serie A សម្រាប់រដូវកាលនេះ៕
ប្រភពព័ត៍មាន៖ BBC
