បរទេស៖ ខ្សែប្រយុទ្ធជើងចាស់ Zlatan Ibrahimovic នឹងត្រូវប៉ះជាមួយនឹងក្រុម Manchester United ក្នុងការប្រកួតក្របខ័ណ្ឌ Europa League របស់ក្រុម AC Milan ជាមួយនឹងក្រុមយក្សរបស់អង់គ្លេស នៅរាត្រីនេះ ខណៈដែលក្រុមឡើងទម្រង់លេង AC Milan ត្រៀមបញ្ហាពីការវិលត្រឡប់របស់ពួកគេនៅលើឆាកប្រកួតធំៗ។
តារាឆ្នើមជើងចាស់របស់ស៊ុយអែតរូបនេះ គួរតែកំពុងស្ថិតក្នុងស្មារតីដ៏ល្អ ក្រោយពីបានប្រកាសពីការវិលត្រឡប់របស់គេទៅកាន់កីឡាបាល់ទាត់អន្តរជាតិ ក្រោយពីការចាកចេញអស់រយៈពេលជិត៥ឆ្នាំ កាលពីថ្ងៃអង្គារ ហើយអាចនឹងរឹងមាំទាន់ពេលដើម្បីជួបជាមួយនឹងអតីតក្លិបរបស់គេ ក្នុងជើងទី២ នៃវគ្គ១៦ក្រុមចុងក្រោយ នាកីឡដ្ឋាន San Siro។ ការប្រកួតកាលពីជើងមុន បានបញ្ចប់ក្នុងលទ្ធផលស្មើ ១-១ ខណៈដែល AC Milan កំពុងតែមានប្រៀបយ៉ាងស្តួចស្តើង ក្រោយពីការរកបានគ្រាប់បាល់ក្រៅដីដ៏សំខាន់របស់កីឡាករ Simon Kjaer នៅចុងម៉ោង ក្នុងការប្រកួតនាកីឡដ្ឋាន Old Trafford កាលពីសប្តាហ៍មុន។
ក្រោយពីរកបាន១៤គ្រាប់ ក្នុងចំណោមការប្រកួតលីក១៤លើក Ibrahimovic វ័យ៣៩ឆ្នាំ គឺជាសមាជិកដ៏សំខាន់ក្នុងការជួយឲ្យក្រុម AC Milan ឡើងឈរនៅលើកំពូលតារាងជាញឹកញាប់ក្នុងការប្រកួតក្របខ័ណ្ឌ Serie A នៅរដូវកាលនេះ ហើយការវិលត្រឡប់របស់គេទៅកាន់កកីឡដ្ឋាន Old Trafford មិនបានកើតឡើងឡើយ ដោយសារតែបញ្ហារបួស៕
ប្រភពព័ត៌មាន៖ Channel News Asia