បរទេស៖ លោក Mikel Arteta បានជួបពិភាក្សាបែបវិជ្ជមានមួយជាមួយនឹងខ្សែប្រយុទ្ធ Pierre-Emerick Aubameyang ក្រោយពីបានលុបឈ្មោះរបស់គេចេញពីក្រុមសម្រាប់ការប្រព្រឹត្តល្មើសនឹងវិន័យ ប៉ុន្តែ បានបដិសេធក្នុងការធានាថា តារាឆ្នើមអន្តរជាតិកាបុងរូបនេះ នឹងទទួលបានតួនាទីប្រធានក្រុមវិញពេលប្រកួតជាមួយនឹងក្រុម Olympiakos នារាត្រីនេះឡើយ។
Aubameyang បានស្ថិតជាកីឡាករបម្រុង ក្រោយពីបានចូលរួមជាមួយនឹងក្រុមយឺតពេល នៅមុនពេលក្រុម Arsenal ផ្តួលក្រុម Tottenham ក្នុងលទ្ធផល ២-១ កាលពីថ្ងៃអាទិត្យ។ កីឡាករវ័យ៣១ឆ្នាំរូបនេះបានចាកចេញពីកីឡដ្ឋាន Emirates ដោយមិនអង្គុយជាមួយនឹងកីឡាករបម្រុងផ្សេងទៀតឡើយ ក្នុងពេលកម្តៅសាច់ដុំ នៅលើទីលាន បន្ទាប់ពីការប្រកួត។ លោក Arteta គ្រូបង្វឹកនៃក្រុមកាំភ្លើងធំ បានបញ្ជាក់ថា រូបលោកត្រូវតែមានភាពច្បាស់លាស់ជាមួយនឹង Aubameyang ដើម្បីរក្សាមូលដ្ឋានគ្រឹះរយៈពេលវែងរបស់ក្លិប។
គ្រូបង្វឹកសញ្ជាតិអេស្ប៉ាញរូបនេះ បានជម្រះភាពសង្ស័យផ្សេងៗជាមួយនឹង Aubameyang ប៉ុន្តែ បានបញ្ជាក់ថា ខ្សែប្រយុទ្ធរូបនេះ នឹងត្រូវកោះហៅឲ្យចូលរួមប្រកួតក្របខ័ណ្ឌ Europa League វគ្គ១៦ក្រុម ជាមួយនឹងក្រុម Olympiakos។ លោក Arteta បានប្រាប់អ្នកយកព័ត៌មានកាលពីថ្ងៃពុធថា៖ «យើងបានពិភាក្សាគ្នា។ អ្វីៗត្រូវបានដោះស្រាយ ក្នុងមធ្យោបាយជាវិជ្ជមាន។ ហេតុនេះ យើងបោះជំហានទៅមុខ»៕
ប្រភពព័ត៌មាន៖ Channel News Asia
