បរទេស៖ លោក Ole Gunnar Solskjaer បានការពារការសម្រេចចិត្តរបស់លោក ក្នុងការប្រើប្រាស់ក្រុមស្ថិតក្នុងជម្រើសទី២ ខណៈដែលក្រុម Manchester United បានធ្លាក់ចេញពីការប្រកួតពាន FA Cup ក្រោយពីចាញ់ក្នុងលទ្ធផល ៣-១ ក្រោមស្នាដៃក្រុម Leicester នាការប្រកួតវគ្គ៨ក្រុមចុងក្រោយ កាលពីថ្ងៃអាទិត្យ។
លោក Solskjaer បានផ្លាស់ប្តូរកីឡាករ៥នាក់ពីក្រុម Man United ដែលបានផ្តួលក្រុម AC Milan ក្នុងការប្រកួតក្របខ័ណ្ឌ Europa League វគ្គ១៦ក្រុមចុងក្រោយ ជើងទី២ កាលពីថ្ងៃព្រហស្បតិ៍។ ខ្សែបម្រើ Paul Pogba បានចូលលេងក្នុងជម្រើសទាំង១១នាក់ដំបូងវិញ ប៉ុន្តែ ខ្សែបម្រើប្រយុទ្ធ Bruno Fernandes បានស្ថិតជាកីឡាករបម្រុងរហូតដល់តង់ទី២ ស្របពេលដែល Marcus Rashford បានអវត្តមានពីក្រុមតែម្តង។ Man United បានឆ្លើយតបទៅនឹងការផ្លាស់ប្តូរនេះ ជាមួយនឹងទម្រង់លេងដ៏ទន់ខ្សោយ ខណៈដែលពួកគេបានរងបរាជ័យជាលើកទី១ ក្នុងចំណោមការប្រកួតក្រៅដីចំនួន៣០លើក។
លោក Solskjaer បានឲ្យដឹងថា៖ «កាលពីថ្ងៃព្រហស្បតិ៍ Bruno បានបំបែកកំណត់ត្រាទាំងអស់លើផ្នែករឹងមាំ ហើយកីឡាកររូបនេះ ពិតជាមិនមែនជាមនុស្សឡើយ។ រូបគេបានលេងការប្រកួតមួយលើករាល់៣ថ្ងៃម្តង។ នេះគឺជាឱកាសមួយក្នុងការដាក់ឲ្យទាំង Donny (Van de Beek) និង Paul (Pogba) លេងក្នុងជម្រើសដំបូង ប៉ុន្តែ ភាពស៊ីសង្វាក់គ្នាក្នុងការប្រកួតនេះ មិនកើតឡើងឡើយ»៕
ប្រភពព័ត៌មាន៖ Channel News Asia