បរទេស៖ ខ្សែប្រយុទ្ធជើងចាស់ Zlatan Ibrahimovic បានរំភើបរហូតស្រក់ទឹកភ្នែក ក្រោយពីរូបគេត្រៀមបង្ហាញខ្លួនសម្រាប់ក្រុមបាល់ទាត់ជម្រើសជាតិស៊ុយអែតក្នុងពេលឆាប់ៗនេះ ក្នុងការប្រកួតជម្រុះ World Cup បន្ទាប់ពីចាកចេញពីការប្រកួតអន្តរជាតិជិត៤ឆ្នាំ។
ជាមួយគ្នានេះ រូបគេបានបញ្ជាក់ថាកូនប្រុសរបស់គេមិនចង់ឲ្យរូបគេចាកចេញពីផ្ទះដើម្បីចូលរួមជាមួយនឹងក្រុមជម្រើសជាតិឡើយ។ កីឡាករវ័យ៣៩ឆ្នាំរូបនេះ ដែលបានចាកចេញពីក្រុមបាល់ទាត់ជម្រើសជាតិ បន្ទាប់ពី Euro ឆ្នាំ២០១៦នោះ បានយំខ្សិបខ្សួល នៅពេលដែលត្រូវបានគេចោទសួរថា តើកូនប្រុសរបស់គេគឺ Maximilian វ័យ១៤ឆ្នាំ និង Vincent វ័យ១២ឆ្នាំ បានគិតបែបណាចំពោះការសម្រេចចិត្តរបស់គេក្នុងការឆ្លើយតបទៅនឹងការកោះហៅឲ្យវិលទៅប្រកួតក្នុងក្រុមជម្រើសជាតិវិញ។
នៅមុនពេលស្រក់ទឹកភ្នែក២-៣ដំណក់ ដោយសារតែរូបគេមានអារម្មណ៍រំជួលចិត្តចំពោះការវិលទៅកាន់ក្រុមជម្រើសជាតិវិញ ក្នុងពេលនិយាយពីមុខក្រុមបណ្តាញសារព័ត៌មានជាលើកដំបូងរបស់គេ ចាប់តាំងពីពីការកោះហៅឲ្យចូលក្នុងក្រុមរបស់លោក Janne Andersson កីឡាករ Ibrahimovic បានប្រាប់សន្និសីទសារព័ត៌មានថា៖ «Vincent បានយំពេលដែលខ្ញុំបានចាកចេញពីគេ»៕
ប្រភពព័ត៌មាន៖ Channel News Asia
