បរទេស៖ លោក Ole Gunnar Solskjaer គ្រូបង្វឹកក្រុមបិសាចក្រហម Man United នឹងធ្វើការសម្រេចពីជោគវាសនាកីឡាករ Diogo Dalot នៅពេលហ្វឹកហាត់ត្រៀមការប្រកួត (Pre Season) ចាប់ផ្តើមរដូវកាលថ្មី ២០២១-២០២២ខាងមុខនេះ។
ខ្សែការពារសញ្ជាតិព័រទុយហ្គាល់វ័យ ២២ ឆ្នាំរូបនេះត្រូវបានក្រុម Man Utd អោយក្លឹប AC Milan ខ្ចីជើងកាលពីដើមរដូវកាល និងបានបង្ហាញខ្លួនចូលលេងទៀងទាត់នៅរដូវកាលនេះនៅលីកកំពូល អ៊ីតាលី ក្រោយពី៣រដូវកាលបង្ហាញខ្លួនចូលលេងបានតែ ៣៥ដង និង ២០ដងនៅលីកកំពូលអង់គ្លេស។ ផ្ទុយទៅវិញនៅទឹកដីអ៊ីតាលីរុបគេចូលលេងបាន ២៥ លើកគ្រប់ក្របខណ្ឌប្រកួតត្រឹមរដូវកាលដំបូង ដោយរកបានគ្រាប់បាល់ ២ គ្រាប់និងបង្កើតឪកាសបាន ២ លើកផងដែរ។
AC Milan បានបង្ហាញពីចេតនាចង់ចុះកុងត្រាជាមួយអតីតកីឡាករក្រុម Porto រូបនេះក្នុង កិច្ចព្រមព្រៀងអចិន្រ្តៃយ៍នៅពេលបញ្ចប់រដូវកាល។ប៉ុន្តែគេហទំព័រអ៊ីតាលី Calciomercato បានចុះផ្សាយថាខ្សែការពារស្លាបស្តាំរូបនេះនឹងត្រូវវិលត្រលប់មកកាន់ទឹកដី Old Trafford នៅពេលលីកកំពូលអ៊ីតាលីបិទបញ្ចប់រដូវកាល៕
ប្រភពព័ត៍មាន៖ Sportsmole