បរទេស៖ ក្លឹបបិសាចក្រហម Man Utd កំពុងត្រៀមរង់ចាំពិចារណាលើសំណើរសម្រាប់ខ្សែការពារស្លាបស្តាំ Diogo Dalot បន្ទាប់ពីកីឡាករវ័យ ២២ ឆ្នាំរូបនេះបានចំណាយពេលខ្ចីជើងពេញមួយរដូវកាលជាមួយ AC Milan ដោយបង្ហាញខ្លួនបាន ៣០ ប្រកួតនៅគ្រប់ការប្រកួតទាំងអស់និងរកបាន ២ គ្រាប់ព្រមទាំង Assist ៣ លើកផងដែរ។
ប្រភពពីគេហទំព័រ The Sun បានចុះផ្សាយថា Dalot ចង់ស្វែងរកជម្រើសលេង១១នាក់ជាប់លាប់ ក្រោយពីមិនអាចប្រជែង តំណែងជាមួយកីឡាករ Aaron Wan-Bissaka នៅទឹកដី Old Trafford ដូច្នេះជម្រើសល្អបំផុតគឺមានតែចាកចេញ។
ប្រភពខាងលើបន្តថាក្រុម AC Milan ត្រៀមផ្តល់នូវទឹកប្រាក់ប្រមាណ ១៥ លានផោននៅពេលដែលទីផ្សារដោះដូរកីឡាករបើកដំណើរការ ដើម្បីដាក់អោយ Man Utd ពិចារណា ។ ទោះបីជា លោក Ole Gunnar Solskjaer ទើបតែបានអះអាងថាកីឡាករអន្តរជាតិព័រទុយហ្គាល់រូបនេះនិងវិលត្រលប់មកក្លឹបដែលជាអាណាព្យាបាលនៅរដូវកាលថ្មីវិញ។ Dalot បច្ចុប្បន្នមានកិច្ចសន្យាជាមួយក្លឹបជើងឯកអង់គ្លេស ២០ សម័យរហូតដល់ខែមិថុនាឆ្នាំ ២០២៣ឯណោះ៕
ប្រភពព័ត៍មាន Football365