បរទេស៖ ក្លឹបបិសាចក្រហម Manchester United ត្រូវបានគេរាយការណ៍ថាពួកគេបានរៀបចំកិច្ចសន្យាថ្មីអោយខ្សែបម្រើ Jesse Lingard នៅរដូវក្តៅខាងមុខនេះ។
លោក Ole Gunnar Solskjaer បានបង្ហាញការចាប់អារម្មណ៍លើខ្សែបបម្រើវ័យ២៨ឆ្នាំរូបនេះនៅក្លឹប West Ham United ជាខ្លាំង ដោយលោក Ole មានគម្រោងប្រើប្រាស់រូបគេសម្រាប់ជម្រើសដំបូងនៅរដូវកាលក្រោយ។ កុងត្រាបច្ចុប្បន្នរបស់ Lingard ជាមួយ Man Utd គឺនៅសល់ត្រឹមតែ១ឆ្នាំទៀតប៉ុណ្ណោះ ហើយបើយោងទៅតាម The Sun មានអោយដឹងថាក្លឹប Man Utd កំពុងត្រៀមកិច្ចសន្យាថ្មី៣ឆ្នាំទៀតអោយកីឡាកររូបនេះ។
លើសពីក្លឹប West Ham United ក៏កំពុងតែព្យាយាមប្រើគ្រប់មធ្យោបាយ ដើម្បីចុះកុងត្រាជាអចិន្រ្តៃយ៍លើកីឡាករអន្តរជាតិអង់គ្លេសរូបនេះនៅពេលចប់រដូវកាលនេះដូចគ្នា ខណៈលោក David Moyes មើលឃើញរូបគេគឺជាកីឡាករដ៏សំខាន់សម្រាប់ក្រុមរបស់លោកនាពេលបច្ចុប្បន្ន។ តម្លៃខ្លួនរបស់ Lingard ប្រហែលខ្ទង់១៥-២០លានផោន ប៉ុន្តែ United អាចនឹងទាមទារច្រើនជាងនេះទៅទៀត ប្រសិនបើកិច្ចព្រមព្រៀងមួយនេះមានភាពច្របូកច្របល់នោះ។ Lingard បានបង្ហាញទម្រង់លេងបានយ៉ាងល្អអោយ West Ham ជាពិសេសថែមទាំងទាក់ទាញចិត្តលោក Gareth Southgate កោះហៅរូបគេចូលក្រុមជម្រើសជាតិអង់គ្លេសវិញថែមទៀតផង៕
ប្រភពព័ត៍មាន៖ Sportsmole