បរទេស៖ ខ្សែប្រយុទ្ធអន្តរជាតិអាហ្សង់ទីន Sergio Aguero នឹងចាកចេញពីក្លិប Manchester City នៅពេលដែលកិច្ចសន្យារបស់គេផុតកំណត់នៅខែកក្កដា ខាងមុខនេះ។
នេះបើយោងទៅតាមការចេញផ្សាយរបស់កាសែត Manchester Evening News កាលពីថ្ងៃចន្ទ។ Aguero បានចូលរួមជាមួយនឹងក្លិប Man City ពីក្លិប Atletico Madrid ក្នុងឆ្នាំ២០១១ និងបានស៊ុតបាល់បញ្ចូលទី២៥៧គ្រាប់ ក្នុងការប្រកួត៣៨៤លើក ចាប់តាំងពីពេលនោះមក ដែលនាំឲ្យរូបគេក្លាយជាអ្នករកបានគ្រាប់បាល់ច្រើនជាងគេប្រចាំក្លិប។ លោក Khaldoon Al Mubarak ប្រធានក្លិប Man City បានបញ្ជាក់ថា លោកនឹងរក្សាទុកពាក្យសម្តីដែលនិយាយពីការចាកចេញរបស់គេរហូតទាល់តែ Aguero ចាកចេញជាផ្លូវការ ប៉ុន្តែ បានប្រកាសថា លោកបានរៀបចំសាងសង់រូបចម្លាក់របស់ខ្សែប្រយុទ្ធរូបនេះហើយ។ លោក Mubarak បានឲ្យដឹងថា៖ «ការរួមចំណែកជួយរបស់ Sergio ចំពោះក្លិប Manchester City ក្នុងរយៈពេល១០ឆ្នាំមក មិនអាចមើលរំលងបានឡើយ»។
ស្របពេលដែលក្លិប Man City កំពុងតែប្រជែងដើម្បីឈ្នះពានក្របខ័ណ្ឌ Champions League ជាលើកដំបូងរបស់ខ្លួន និងកំពុងមានក្តីសង្ឃឹមខ្ពស់ក្នុងការឈ្នះពាន Premier League លោកបានបន្ថែមទៀតថា៖ «នេះមិនមែនជាពេលវេលានៃការនិយាយលាគ្នាឡើយ។ យើងនៅសល់សមិទ្ធផលជាច្រើនទៀតដែលត្រូវសម្រេចឲ្យបាន»៕
ប្រភពព័ត៌មាន៖ Channel news Asia
