បរទេស៖ ក្លិប Manchester City នឹងចំណាយក្នុងពេលបើកទីផ្សារដោះដូរកីឡាករ ដើម្បីស្វែងរកខ្សែប្រយុទ្ធម្នាក់ដែលអាចជំនួសកន្លែង Sergio Aguero បាន ហើយក៏ពង្រឹងចន្លោះខ្វះខាតជាទូទៅក្នុងក្រុមផងដែរ។
នេះបើយោងទៅតាមការបញ្ជាក់របស់លោក Khaldoon Al Mubarak ដែលជាប្រធានក្លិប។ ខ្សែប្រយុទ្ធអន្តរជាតិអាហ្សង់ទីន Aguero ដែលជាអ្នករកបានគ្រាប់បាល់ច្រើនជាងគេរបស់ Man City តាមរយៈការរកបាន២៦០គ្រាប់នោះ នឹងចូលរួមជាមួយនឹងក្លិប Barcelona ក្នុងកិច្ចសន្យារយៈពេល២ឆ្នាំ នៅខែកក្កដា ក្រោយពីកិច្ចសន្យារបស់គេផុតកំណត់។ លោក Al Mubarak បានប្រាប់គេហទំព័ររបស់ក្លិប កាលពីថ្ងៃអង្គារថា៖ «យើងបានបាត់បង់ខ្សែប្រយុទ្ធដ៏សំខាន់ម្នាក់ដូចជា Sergio Aguero។ ក្រុមការងាររបស់យើងកំពុងតែខិតខំព្យាយាមស្វែងរកអ្នកជំនួស ប៉ុន្តែ ខ្ញុំជឿជាក់ថា យើងនឹងរកឃើញកីឡាករដែលត្រឹមត្រូវក្នុងការបំពេញចន្លោះប្រហោងនោះ»។
លោកបានបន្ថែមទៀតថា៖ «មានតំបន់ជាច្រើនក្នុងក្រុមនេះ ដែ លត្រូវធ្វើការពង្រឹង ពិតណាស់ ក្រុមនេះត្រូវការការបណ្តាក់ទុនបន្ថែមទៀត តែមិនច្រើនពេកហើយ។ វាមិនអាស្រ័យទៅលើតួលេខឡើយ តែសំខាន់លើគុណភាព។ ចំណុចមួយដែលខ្ញុំបានរៀនក្នុងរយៈពេលជាច្រើនឆ្នាំមកនេះគឺថា អ្នកត្រូវតែនាំយកទេពកោសល្យទៅបង្ហាញក្នុងក្រុម ជាពិសេសពេលដែលអ្នកស្ថិតក្នុងកម្រិតដ៏ខ្ពស់ និងពេលដែលអ្នកឈរលើកំពូល»៕
ប្រភពព័ត៌មាន៖ Channel News Asia