បរទេស៖ ក្លិប Barcelona កាលពីថ្ងៃចន្ទបានប្រកាសថា ខ្សែប្រយុទ្ធ Sergio Aguero របស់ក្លិប Manchester City នឹងចូលរួមជាមួយនឹងក្លិបនេះ នៅថ្ងៃទី១ ខែកក្កដា នៅពេលដែលកិច្ចសន្យារបស់គេជាមួយនឹងក្រុមម្ចាស់ជើងឯករងនៃក្របខ័ណ្ឌ Champions League មួយនេះ ផុតកំណត់។
ខ្សែប្រយុទ្ធអន្តរជាតិអាហ្សង់ទីន Aguero បានចូលរួមជាមួយនឹងក្លិប Man City ពីក្លិបអេស្ប៉ាញ Atletico Madrid ក្នុងឆ្នាំ២០១១ និងបានក្លាយជាអ្នករកបានគ្រាប់បាល់ច្រើនជាងគេប្រចាំក្លិប ដោយបានស៊ុតបាល់បញ្ចូលទី២៦០គ្រាប់ ខណៈដែលរូបគេបានជួយឲ្យ Man City ឈ្នះពានក្របខ័ណ្ឌ Premier League ៥លើក រួមទាំងពានលីកនៅរដូវកាលនេះផងដែរ។ ក្លិប Barca បានបញ្ជាក់ថា ខ្សែប្រយុទ្ធវ័យ៣២ឆ្នាំរូបនេះ បានចុះកិច្ចសន្យារយៈពេល២ឆ្នាំកាលពីថ្ងៃចន្ទ រួមជាមួយនឹងលក្ខខណ្ឌរំលាយលិច្ចសន្យាចំនួន១០០លានអឺរ៉ូ (ស្មើនឹង១២២,៤លានដុល្លារអាមេរិក) នៅមុនពេលរូបគេបង្ហាញមុខចំពោះក្រុមអ្នកយកព័ត៌មាននៅល្ងាចថ្ងៃដដែលនោះ។
Aguero ត្រូវបានរំពឹងទុកថា គឺជាកីឡាករចំណូលថ្មីដំបូងគេនៅកីឡដ្ឋាន Camp Nou នៅរដូវក្តៅនេះ ខណៈដែលប្រធានថ្មីលោក Joan Laporta សម្លឹងរកការជួសជុលក្រុម Barcelona ដែលត្រឹមតែអាចដណ្តើមបានលេខ៣ នៅរដូវកាលនេះ៕
ប្រភពព័ត៌មាន៖ Channel News Asia