បរទេស៖ ខ្សែប្រយុទ្ធ Robert Lewandowski នឹងត្រូវអវត្តមានក្នុងការប្រកួតជម្រុះ World Cup ឆ្នាំ២០២២ របស់ក្រុមជម្រើសជាតិប៉ូឡូញ ជាមួយនឹងក្រុមជម្រើសជាតិអង់គ្លេស ដោយសារតែរបួសជង្គង់ស្តាំ។
នេះបើយោងទៅតាមការបញ្ជាក់របស់សហព័ន្ធកីឡាបាល់ទាត់ប៉ូឡូញ កាលពីថ្ងៃចន្ទ។ ខ្សែប្រយុទ្ធរបស់ក្លិប Bayern Munich រូបនេះ បានរងរបួស ក្នុងពេលក្រុមខ្លួនបានយកឈ្នះលើក្រុមជម្រើសជាតិអង់ដូរ៉ា ក្នុងលទ្ធផល ៣-០ ក្នុងទីក្រុង Warsaw ដោយរូបគេបានស៊ុតបាល់បញ្ចូលទី២គ្រាប់ ប៉ុន្តែ ត្រូវតែប្តូរចេញ នៅនាទី ទី៦៣។ សហព័ន្ធបានឲ្យដឹងក្នុងសេចក្តីថ្លែងការណ៍មួយថា៖ «ការព្យាបាលប្រភេទរបួសបែបនេះ ជាធម្មតាចំណាយពេលពីចន្លោះ៥ ទៅ១០ថ្ងៃ។ ហេតុនេះ Robert Lewandowski នឹងវិលទៅកាន់ក្លិប ដែលជាកន្លែងរូបគេនឹងទទួលការព្យាបាលបន្ថែមទៀត»។ ការអវត្តមាន Lewandowski នឹងផ្តល់ការខកចិត្តដ៏ធំមួយចំពោះប៉ូឡូញ ដែលកំពុងតែពឹងផ្អែកទៅលើតារាឆ្នើមរបស់ពួកគេក្នុងពេលប្រកួតជាមួយនឹងក្រុមជម្រើសជាតិអង់គ្លេស នៅក្នុងការប្រកួតដែលគេចាត់ទុកថា គឺជាការប្រកួតដ៏តានតឹងបំផុតក្នុងយុទ្ធនាការជម្រុះរបស់ពួកគេ។
ប៉ូឡូញ បច្ចុប្បន្នកំពុងតែស្ថិតក្នុងចំណាត់ថ្នាក់លេខ៣ ក្នុងពូល I ដោយមាន៤ពិន្ទុ ដោយតាមពីក្រោយក្រុមរបស់លោក Gareth Southgate ចំនួន២ពិន្ទុ និងស្មើពិន្ទុជាមួយនឹងក្រុមជម្រើសជាតិហុងគ្រី ក្រោយពីបានបញ្ចប់ក្នុងលទ្ធផល ៣-៣ ក្នុងទីក្រុង Budapest និងដណ្តើមបានជ័យជម្នះកាលពីថ្ងៃអាទិត្យ។ Lewandowski បានស៊ុតបាល់បញ្ចូលទី៣គ្រាប់ ក្នុងការប្រកួតទាំង២លើកនោះ ក្រោយពីរកបាន២គ្រាប់ពេលប្រកួតជាមួយនឹងអង់ដូរ៉ា និង១គ្រាប់ពេលប្រកួតជាមួយនឹងហុងគ្រី៕
ប្រភពព័ត៌មាន៖ Channel News Asia
