បរទេស៖ លោក Pep Guardiola បានកោតសរសើរ «សមត្ថភាពដ៏អស្ចារ្យ» របស់ខ្សែប្រយុទ្ធ Erling Haaland នៃក្លិប Borussia Dortmund ខណៈដែលលោកបានទទួលស្គាល់ថា Manchester City អាចនឹងចំណាយទឹកប្រាក់ដ៏ច្រើនសន្ធឹកសន្ធាប់ដើម្បីនាំយកកីឡាករម្នាក់ដែលកម្រិតដូចរូបគេ។
Man City គឺជាក្លិបមួយក្នុងចំណោមក្លិបកំពូលៗដែលទាក់ទងចង់ផ្ទេរ Haaland ក្នុងពេលបិទរដូវកាល។ ខ្សែប្រយុទ្ធអន្តរជាតិន័រវែសរូបនេះ កំពុងតែក្លាយជាប្រធានបទក្តៅនៃការពិភាក្សានានានៅអឺរ៉ុប ក្រោយពីបានស៊ុតបាល់បញ្ចូលទី៣៣គ្រាប់ ក្នុងការប្រកួត៣២លើកនៅរដូវកាលនេះ ស្របពេលដែលរូបគេបានក្លាយជាកីឡាករវ័យក្មេងបំផុតដែលរកបាន២០គ្រាប់ក្នុងក្របខ័ណ្ឌ Champions League។ ដោយស្គាល់ពីសមត្ថភាពរបស់ Haaland យ៉ាងច្បាស់ លោក Guardiola គ្រូបង្វឹករបស់ក្រុម Man City មានឱកាសមើលកាន់តែកៀក នៅពេលដែលក្រុម Dortmund ធ្វើដំណើរទៅកាន់កីឡដ្ឋាន Etihad ដើម្បីប្រកួតក្របខ័ណ្ឌ Champions League វគ្គ៨ក្រុមចុងក្រោយ ជើងទី១ នៅរាត្រីនេះ។
លោក Guardiola បានប្រាប់អ្នកយកព័ត៌មានកាលពីថ្ងៃចន្ទថា៖ «រូបគេមានកម្រិតលេងដ៏អស្ចារ្យបើគិតចាប់អាយុរបស់គេ។ តួលេខគឺជាភស្តុតាងបង្ហាញឲ្យឃើញយ៉ាងច្បាស់។ រូបគេអាចស៊ុតបាល់បញ្ចូលទីពីខាងស្តាំ ខាងឆ្វេង ពេលវាយសម្រុករហ័ស នៅក្នុងប្រអប់ទី និងប្រើក្បាលតែត។ រូបគេជាខ្សែប្រយុទ្ធដ៏អស្ចារ្យម្នាក់ ហើយគ្រប់គ្នាដឹងយ៉ាងច្បាស់»៕
ប្រភពព័ត៌មាន៖ Channel News Asia
