បរទេស៖ ខ្សែប្រយុទ្ធ Erling Haaland បានធ្វើការព្រមមានដល់គូប្រជែងដណ្តើមពានរបស់ក្រុម Manchester City ថា រូបគេនឹងបង្កើតឲ្យបរិស្ថានប្រកួតប្រជែងកាន់តែស្វិតស្វាញ ក្នុងកីឡាបាល់ទាត់អង់គ្លេស ខណៈដែលតារាឆ្នើមអន្តរជាតិន័រវែសរូបនេះ ត្រៀមខ្លួនសម្រាប់ការបង្ហាញខ្លួនជាលើកដំបូងរបស់គេក្នុងក្របខ័ណ្ឌ Premier League នៅលើទឹកដីក្រុម West Ham នៅថ្ងៃអាទិត្យ។
Haaland គឺជាកីឡាករចំណូលថ្មីដែលមានតម្លៃខ្លួនដ៏ខ្ពស់ម្នាក់ ខណៈដែលក្របខ័ណ្ឌ Premier League បានចំណាយទឹកប្រាក់សរុបច្រើនជាង១ពាន់លានផោន (ស្មើនឹង១,២លានដុល្លារអាមេរិក) ទៅលើការដោះដូរកីឡាករ នៅមុនពេលយុទ្ធនាការថ្មីចាប់ផ្តើម។ កីឡាករវ័យ២២ឆ្នាំរូបនេះ បានស្ថិតក្នុងរ៉ាដារបស់ក្លិបកំពូលៗជាច្រើន ក្រោយពីបានស៊ុតបាល់បញ្ចូលទី៨៦គ្រាប់ ក្នុងការប្រកួត៨៩លើកសម្រាប់ក្រុម Borussia Dortmund ប៉ុន្តែ បាននិយាយថា បំណងក្នុងការលេងក្រោមការដឹកនាំរបស់លោក Pep Guardiola គឺជាហេតុផលចម្បងរបស់គេក្នុងការជ្រើសរើសយក Man City។
Haaland បានប្រាប់ទូរទស្សន៍ Sky Sports ថា៖ «ក្នុងនាមជាកីឡាករវ័យក្មេងម្នាក់ ការលេងឲ្យលោក Pep Guardiola ការលេងឲ្យក្លិបដ៏ខ្លាំងបំផុតនៅអង់គ្លេស ខ្ញុំត្រូវតែរក្សាការអភិវឌ្ឍ និងធ្វើឲ្យកាន់តែល្អប្រសើរ។ នោះគឺជាកត្តាដែលខ្ញុំចង់លេងបាល់ទាត់ឲ្យបានច្រើន។ អ្នកតែងតែអាចអភិវឌ្ឍ អ្នកតែងតែអាចធ្វើឲ្យកាន់តែល្អប្រសើរក្នុងកីឡានេះ»។ ក្រុមម្ចាស់ការពារតំណែងជើងឯករបស់អង់គ្លេសមួយនេះ គឺជាក្លិបទី៥របស់ Haaland ក្រោយពីបានចំណាយពេលនៅក្លិប Bryne, Molde និង Red Bull Salzburg មុននឹងចូលរួមជាមួយនឹងក្លិប Dortmund៕
ប្រភពព័ត៌មាន៖ Channel News Asia