បរទេស៖ ខ្សែប្រយុទ្ធ Erling Haaland បាននិយាយថា ការផ្ទេររបស់គេទៅកាន់ក្លិប Manchester City ពីក្លិប Borussia Dortmund គឺជាការ «ផ្ទេរដ៏អស្ចារ្យ» សម្រាប់អាជីពរបស់គេ ខណៈដែលកីឡាករអន្តរជាតិន័រវែសរូបនេះ មានបំណងជួយឲ្យក្រុមម្ចាស់ជើងឯកក្របខ័ណ្ឌ Premier League ឈ្នះពានបន្ថេមជាច្រើនទៀត។
Man City បានប្រកាសកាលពីខែមុនថា ពួកគេបានឈ្នះក្នុងការប្រជេងជាមួយនឹងក្លិបធំៗនៅអឺរ៉ុប ដើម្បីឈានដល់កិច្ចព្រមព្រៀងជាមួយនឹងក្លិបយក្សរបស់អាល្លឺម៉ង់ ក្រោយពីបានចំណាយប្រាក់រំលាយកិច្ចសន្យារបស់ Haaland ចំនួន៥១លានផោន (ស្មើនឹង៦៣លានដុល្លារអាមេរិក)។ ការផ្ទេររបស់កីឡាករវ័យ២១ឆ្នាំរូបនេះ ត្រូវបានបំពេញជាផ្លូវការ កាលពីថ្ងៃចន្ទ ខណៈដែល Haaland បានចុះកិច្ចសន្យារយៈពេល៥ឆ្នាំ ដើម្បីដើរតាមជំហានឪពុករបស់ខ្លួនគឺលោក Alfie Inge Haaland ដែលបានលេងឲ្យក្លិប Man City នៅចន្លោះឆ្នាំ២០០០ និង២០០៣។
Haaland បានឲ្យដឹងថា៖ «នេះគឺជាថ្ងៃដ៏មានមោទនភាពសម្រាប់ខ្ញុំ និងគ្រួសារខ្ញុំ។ ខ្ញុំតែងតែទស្សនាការប្រកួតរបស់ Man City និងពេញចិត្តនឹងសមិទ្ធផលនារដូវកាលថ្មីៗនេះ»។ តារាឆ្នើមរូបនេះ បានបន្ថែមទៀតថា៖ «ខ្ញុំចង់ស៊ុតបាល់បញ្ចូលទីឲ្យបានច្រើនគ្រាប់ ឈ្នះពានរង្វាន់ជាច្រើន និងអភិវឌ្ឍក្នុងនាមជាកីឡាករបាល់ទាត់ម្នាក់ ហើយខ្ញុំជឿជាក់ថា ខ្ញុំអាចធ្វើបាន។ នេះគឺជាការផ្ទេរដ៏អស្ចារ្យសម្រាប់ខ្ញុំ ហើយខ្ញុំពិតជាចង់លេងការប្រកួតមុនបើករដូវកាល»៕
ប្រភពព័ត៌មាន៖ Channel News Asia